د فني او حرفوي زده کړو مرکز د رغېدلو معتادینو لاسي تولیدات نندارې ته وړاندې شول
د کار او ټولنیزو چارو وزارت تر چتر لاندې؛ پلچرخي کمپ رغېدلو معتادینو او له فني او حرفوي زده کړو څخه فارغ شویو ځوانانو، په بېلا بېلو حرفو کې تر نظري او عملي زدهکړو ترلاسه کولو وروسته؛ په خپل لاس جوړ کړي بوټان، بیکونه، کالي او داسې نور تولیدات د افغانستان د توليدي او خدماتي ظرفيتونو په نړیوال نندارتون کې نندارې ته وړاندې کړل.
په یاد نندارتون کې د کار او ټولنیزو چارو وزارت اړوند د پلچرخي کمپ د رغېدلو معتادینو او د فني او حرفوي زده کړو په مختلفو خیاطۍ، بوټ جوړونې، بیک جوړونې، جامو ګنډلو او د کورنیو برېښنایي وسایلو د ترمیم په حرفو کې تولیدات شامل دي چې په لوړ او معياري کیفیت سره جوړ او مناسب قیمت سره نندارې ته وړاندې شول.
دا په داسې حال کې ده، چې د افغانستان د توليدي او خدماتي وړتياوو په نړیوال نندارتون کې د ټول هېواد په سطحه د امارتي او غیر امارتې شرکتونو؛ صنعت کارانو، فابریکو او فارمونو هم خپل توکي نندارې ته وړاندې کړل؛ ترڅو سوداګریزې اړیکې پیاوړې، د صادراتو کچه پراخه، نوي پانګوال او مشتریان را جذب، پیاوړې فرهنګي او علمي تجربې شریکې کړي او عام خلک له صنعت، کرنې، ټکنالوژۍ، روغتیا او د نورو برخو له تولیداتو او محصولاتو سره بلد کړي.
د یادونې وړ ده، چې یاد نندارتون به د عقرب میاشتې تر اولسمې نېټې پورې به د ټولو هېوادوالو پر مخ پرانېستی وي.
