کابل کې ۶۰۰ تنه یتیمو او بې سرپرستو ماشومانو ته نقدي پیسې ووېشل شوې
د کار او ټولنیزو چارو وزارت په هڅو او همغږۍ؛ کابل کې ۶۰۰ تنه یتیمو او بېسرپرسته ماشومانو ته نقدي پیسې، في نفر ته ۶۶۰۰ افغانۍ په مجموعي ډول د۳۹۶۰۰۰۰ افغانۍ ووېشل شوې.
په همدې مناسبت جوړې شوې غونډې ته د کار او ټولنیزو چارو وزارت د مالي او اداري چارو معین الحاج مولوي دین محمد حقبین په خپلو خبرو کې د BGK خیریه بنسټ له همکاریو او مرستې د مننې سربېره وویل: یتیم او بېسرپرسته ماشومان د ټولنې تر ټولو زیان سره مخ قشر دی، چې ځانګړې پاملرنه او ملاتړ ته اړتیا لري. نوموړي ټینګار وکړ چې د کار او ټولنیزو چارو وزارت د دغو ماشومانو د ښه ژوند، زدهکړې، روغتیا او سرپنا او نورو آسانتیاوو په برخو کې هڅه کوي، ترڅو له محرومیت څخه وژغورل شي.
مولوي حقبین د خپلو خبرو په دوام له نورو همکارو موسساتو او خیریه بنسټونو څخه وغوښتل، چې د کار او ټولنیزو چارو وزارت په همغږۍ او د ا.ا.ا د اصولو او قوانینو په نظر کې نیولو سره، دې او دې ته ورته مرستو او همکاریو ته پراختیا ورکړي، چې په دې سره به د یتیمو او بېسرپرستو ماشومانو لاسنیوي او ستونزو ته مؤثره رسېدنه وشي.
په پای کې د BGK خیریه بنسټ رئیس عمر فاروق توانا هم په خپلو خبرو کې د کار او ټولنیزو چارو وزارت له ښې همغږۍ او دوامداره همکاریو څخه د مننې سربېره وویل: دا بنسټ په افغانستان کې یتیمو او بېسرپرستو ماشومانو ته په میاشتني ډول د خوراکي توکو، ژمنیو مرستو، د یتیمو او بې سرپرستو ماشومانو ته د سرپناوو جوړولو او درملنې په برخه کې خپل خدمات وړاندې کوي.
د یادونې وړده، چې په یاده غونډه کې د بشري ځواک لوی رئیس مولوي عزتالله عارف، د تکنالوژۍ او معلوماتو رئیس آغامحمد حیدري او د مطبوعاتو رئیس سمیعالله ابراهیمي هم حضور درلود.
