ننګرهار کې ۱۰۰ تنه بېوزلو کسانو ته د کوچنیو کاروبارونو زمینه برابره شوه
ننګرهار ولایت د کار او ټولنیزو چارو ریاست په هڅو او همغږۍ؛ د یاد ولایت اړوند کوټ ولسوالۍ کې ١٠٠ تنه بېوزلو او اړمنو کسانو، فی نفر ۲۱۱۴۰ افغانۍ، مجموعاً ۲۱۱۴۰۴۰ افغانیو په ارزښت د کوچنیو کاروبارونو د ملاتړ په موخه د چرګانو روزنې، ترکاڼۍ، بنجارۍ، معمارۍ، موبایل ترمیم، بوټکنډلو، خیاطۍ، دوکاندارۍ، بایسکل ترمیم، پولیو کراچۍ، موټرسایکل او جنراتور د ترمیم وسایل ترلاسه کړل.
هغې غونډې ته، چې په همدې مناسبت جوړه شوې وه؛ د ننګرهار ولایت د کار او ټولنیزو چارو ریاست استازي د ستاسې غږ له همکارې مؤسسې څخه د مننې سربیره له نورو ملي او نړیوالو موسساتو او مرستندویه خیریه بنسټونو څخه هم د ورته مرستو او همکاریو غوښتنه وکړه، ترڅو په دې سره په هېواد کې د بیکارۍ کچه راټیټه شي.
