د کار او ټولنیزو چارو وزارت سرپرست په مشرۍ میاشتنۍ اداری ناسته جوړه شوه
د کار او ټولنیزو چارو وزارت میاشتنۍ اداري غونډه د وزارت د سرپرست ملا عبدالولي څارنوال( حاجي وارث) په مشرۍ جوړه شوه، چې په کې د مالي او اداري چارو مرستیال مولوي دین محمد حقبین او کار چارو مرستیال مولوي مخدوم عبدالسلام سعادت سربیره د کار او ټولنیزو چارو وزارت ټولو رئيسانو هم برخه اخیستې وه.
دغه ناسته چې د قران کریم په مبارکو آیتونو پیل شوه؛ تر قرائت وروسته د کار او ټولنیزو چارو وزارت سرپرست ملا عبدالولي څارنوال( حاجي وارث) د اجنډا مطابق خبرې و کړې؛ مسؤلین یې خپلو دندو ته متوجه او د امارت اسلامي د اصولو پر اطاعت یې ټینګار وکړ.
وروسته د وزارت مقام د دفتر رئيس مولوي شرف الدین شرف له لوري د ادارې جلسې اجنډا ګډونوالو ته واورول شوه.
د رمضان المبارک ۲۵مې نیټې ادارې ناسته کې د وزارت سرپرست، مرستیالانو او رئيسانو له لوري؛ د اجنډا مطابق؛ چارو ادارې ته د هوایي میدانونو او ځمکنیو بندرونو کې بهرنیو وګړو ته د کار جواز ویشلو او روږدې کسانو را ټولولو او هغوی ته د فني او حرفوي زده کړو اړوند لیږل شویو طرحو؛ د سوالګرو را ټولولو او بېکارۍ سطحې را ټیټولو طرحو اړوند هر اړخیزې خبرې و شوې او د سمون لپاره یې اړوندو مسؤلینو ته لازمې لارښوونې و شوې.
په ناسته کې د ثور اتمې او اختر رخصتیو اړوند هم خبرې و شوې چې د کار او ټولنیزو چارو وزارت سرپرست وویل، چې د ثور اتمې اړوند یې ریاست الوزرا عالي مقام له وړاندې په جریان کې اچولی، چې د عالي مقام په لارښوونه اتم د ثور هیواد کې عمومي رخصتي دی.
همدارنګه په دې ناسته کې د مرکزي او دویمو اداري واحدونو له لوري نظارت او ارزیابۍ ریاست ته په وخت د راپورونو نه لیږلو اړوند هم بحث و شو، چې د وزارت سرپرست له لوري ټولو رئیسانو ته جدي سپارښتنه وشوه؛ څو وروسته له دې په وخت خپل اجرات ترسره کړي.
د کار او ټولنیزو چارو وزارت میاشتنې اداري ناسته کې د وزارت سرپرست د عالي مقام د لارښوونو، احکامو او فرامینو د تکثیر او په وخت د مسؤلو مراجعو له لوري د اجراتو ترسره کولو اړوند سپارښتنه و کړه او هم یې ټینګار و کړ؛ څو د وزارت میاشتنی او شپږ میاشتنی کاري ګزارش هم په وخت جوړ او دفتر ریاست ته په واک کې ور کړل شي؛ څو د عالي مقام سره شریک شي.
همدارنګه په دې ناسته کې د ټولو بیا کتل شویو قوانینو او مقررو، د هغو موضوعاتو چې د دین، حنفي فقهې او اسلامي امارت پالیسۍ سره په ټکر کې دي هم خبرې و شوې او سپارښتنه و شوه، چې یاد موضوعات باید تنظیم او د تعدیل په موخه د چارو ادارې ته و لیږل شي.
په دې ناسته کې د معلوماتي ټکنالوژۍ ریاست ته لارښوونه و شوه؛ څو د کارونو د لا ښه سمون او ښو کاري اړیکو په موخه یو مخابراتي شرکت سره د ګروپي سیمکارتونو اړوند خبرې و کړي او د وزارت مقام تر لارښوونې وروسته ورسره هوکړه لیک لاسلیک کړي.
په اداري ناسته کې مالي او اداري چارو مرستیال مولوي دین محمد حقبین هم خبرې و کړې، کارکوونکو سره په تعامل یې ټینګار و کړ او ځینو کاري ستونزو ته په اشارې یې له ټولو کارکوونکو و غوښتل؛ څو خپل کارونه په ښه همغږۍ مخته یوسي.
د کار چارو مرستیال مولوي مخدوم عبدالسلام سعادت بیا د خپلو خبرو په ترڅ کې د کار او ټولنیزو چارو وزارت له لوري جوړې شوې طرحې مهمې و بللې او تر تائید وروسته یې د طرحو په ښه پلي کولو کې د ټولو همکارانو همغږي او همکاري اړینه و بلله.
په یاده ناسته کې د وزارت رئيسانو د ور سپارل شویو دندو، ستونزو او حل په موخه ځینې وړاندیزونه و کړل، چې د کار او ټولنیزو چارو وزارت سرپرست او رهبرۍ له لوري د ستونزو د حل ژمنه و شوه او ټولو رئیسانو ته سپارښتنه و شوه، څو د کارونو په ښه ترسره کولو او سمون کې لا زیاته هڅه و کړي.
