د کار او ټولنیزو چارو وزارت سرپرست پخپل کاري دفتر کې، افغانستان لپاره د یونیسف له مسؤل سره وکتل
د کار او ټولنیزو چارو وزارت سرپرست الحاج ملا عبدالمنان عمري نن په خپل کاری دفتر کې افغانستان لپاره د ملګرو ملتونو سازمان د ماشومانو ادارې (یونیسف) له مسؤل فران ایکویزا سره وکتل. کتنه کې چې د وزارت مقام د دفتر رئیس ملا شرفالدین شرف هم حضور درلود، ښاغلي ایکویزا د افغانستان اسلامي امارت په ځانګړې توګه د کار او ټولنیزو چارو وزارت له لورې د ماشومانو اړوند ترسره شوي خدمات وستایل او زیاته یې کړه چې د امارت مسؤلین په سختو شرایطو کې توانیدلي چې پدې برخه کې تر ډېره بریده شته ستونزو ته رسیدګی وکړي. نوموړي همداراز د خپلو کړنو او فعالیتونو په اړه هم توضیحات شریک او د ځینو ستونزو څخه یې یادونه وکړه او د کار او ټولنیزو چارو له سرپرست وزیر یې و غوښتل ترڅو د ستونزو د حل په موخه د دواړو لورو لخوا یوه ګډه کاري کمیټه جوړه شي. ورپسې د کار او ټولنیزو چارو سرپرست وزیر الحاج ملا عبدالمنان عمري خپلو خبرو کې د یادې کمیټې د جوړېدو په اړه چمتوالی وښود او هم یې ټینګار وکړ چې هغه مؤسسات او انجوګانې چې دې وزارت سره هوکړهلیکونه لري؛ خپلې کړنې او فعالیتونه دې د ریاست الوزراء مقام څخه د تایید شوي طرزالعمل مطابق عیار کړي، د مرستو په وېش کې دې عدالت تامین او هم دې فساد سره د مبارزې په برخه کې جدې او عملي اقدام وکړي.
