د کار چارو معین د مختلفو سکتورونو د اتاقونو له استازو سره ولیدل
د کار او ټولنیزو چارو وزارت، د کار چارو معین مولوي محمد زاهد جان آغا د خپل کار په دفتر کې د مختلفو اتاقونو له استازو سره، د کارعالي شورا ناستو ته د خصوصي سکتور(کار فرمایانو اتحادیې) له آدرسه د استازي د معرفۍ په اړه، ناسته کې د هغوی وړاندیزونه او غوښتنې واورېدې.
د کارچارو معین مولوي محمد زاهد جان آغا مېلمنو ته د ښه راغلاست سربېره؛ څرګنده کړه چې، د کار نړیوال سازمان معیارونو ته په پام، اړینه ده ترڅو د دولت، کارفرما او کارګرانو اتحادیې د جوړښت ترمنځ پیاوړې او نږدې اړیکې موجودې او له دې آدرسه په ملي او نړیوالو سټېجونو کې د خصوصي سکتور( کارفرما) له آدرسه منظم استازیتوب ولرو ترڅو له یوې خوا مو د هېواد ملي ګټې خوندي او له بلې خوا وشو کولای تر یوه واحد چتر لاندې د خصوصي سکتور په پیاوړتیا او پرمختګ کې د ښو لاسته راوړنو شاهدان پاتې شو.
ناسته کې د کسبګرو، کرنې او مالدارۍ، صنعت او معدنونو او د نړیوالۍ سوداګرۍ د خونو استازو خپلو خبرو کې د یادو خونو د فعالیت د څرنګوالي او د افغانستان د اسلامي امارت له لوري د صنعت او تجارت په برخو کې د مناسبو سهولتونو د رامنځته کېدو له امله په مننې سره وویل: خوشبختانه دا سهولتونه د دې باعث شوي چې د مختلفو سکتورونو ۱۲۴ قلمه توکو په تولید کې سل سلنه ځان بساینې ته او تر ۱۰۰ ډېرو اقلامو کې نیمه ځان بساینې ته ورسیږو، د دې ترڅنګ د مختلفو هېوادونو پانګه وال تشویق شوي ترڅو افغانستان کې پانګونه وکړي، چې د هغوی له لوري هم لېوالتیا ښودل شوې. د یادو خونو استازو د خپلو خبرو په دوام غوښتنه درلوده، چې د خصوصي سکتور له آدرسه دې د کار عالي شورا ناستو ته یو تن استازی معرفي شي.
ورپسې د صنعت او سوداګرۍ وزارت استازي هم خپلو خبرو کې ډاډ ورکړ چې، دا وزارت د ټولو سکتورونو د خونو ملاتړی او پدې برخه کې همکارۍ ته چمتو دی.
په همدې ترتیب د کار او ټولنیزو چارو وزارت، د تقنین او د کار د حقوقو او د کار د قواعدو او شرایطو د بهبود رئیسانو د موضوع په تړاو خپل نظریات، وړاندیزونه او غوښتنې شریکې کړې.
د بحثونو په جمعبندۍ کې د کار چارو معین مولوي محمد زاهد جان آغا پرېکړه وکړه چې د صنعت او تجارت وزارت سره په ګډه په یوې ناسته کې به د ټولو اتاقونو د مشرتابه په حضور د خصوصي سکتور له آدرسه د یو تن استازي د معرفۍ لپاره تصمیم ونیول شي.
