خوست ولایت کې شپږ ورځنی د ظرفیت لوړونې پروګرام پیل شو؛
د کار او ټولنیزو چارو وزارت معین الحاج مولوي محمد زاهد احمدزي خوست ولایت ته پخپل کاري سفر کې، د دې ولایت د مختلفو ریاستونو کارکوونکو ته د ظرفیت لوړونې شپږ ورځنی پروګرام پرانېست.
د یاد پروګرام په په پیل کې د کار او ټولنیزو چارو وزارت د انسټیټوټ رئیس شریفالله شرافت خپله لنډه وینا کې د ظرفیت لوړونې په برخو کې د مختلفو برنامو په لار اچولو څخه یادونه ترسره او په راتلونکي کې د دې برنامو د پراختیا ډاډ ورکړ.
ورپسې د کار چارو معین خپلو خبرو کې وویل: د خوست ولایت په غوښتنه د ادارې او مدیریت، د مدیریت مفاهیمو او غونډو د مدیریت شپږ ورځنی پروګرام به، د دې ولایت د ریاستونو او ولسوالیو کارکوونکو ته د کار او ټولنیزو چارو وزارت د انسټیټوټ د مجربو استادانو له لوري په نظري او عملي ډول تدریس شي. مولوي محمد زاهد احمدزي د پروګرام له ګډونوالو غوښتنه درلوده، چې د زدهکړو له بهیر څخه دې لازمه استفاده ترسره او خپلو ورځنیو چارو کې دې ورڅخه ګټه واخلي، ترڅو له دې لارې خوست مېشتو ولسونو ته د خدماتو بهیر چټک او هم اجراآت په خپل وخت ترسره شي
