په کونړ کې سږ کال ۲۵۰۰ تنو فني او حرفوي زدهکړې ترلاسه کړې دي
د کونړ ولایت د کار او ټولنیزو چارو ریاست په هڅو، د یو کال په جریان کې ۲۵۰۰ تنه ځوانان له مختلفو حرفو څخه فارغ شوي دي. د کونړ ولایت د کار او ټولنیزو چارو رئیس مولوي مجیب الله عمر په دې تړاو وايي: خلکو ته د کاري فرصتونو او د اسانتیاوو د برابرولو په برخه کې سږ کال توانېدلي یو، چې د کونړ په مرکز او ولسوالیو کې ۲۵۰۰ تنه په مختلفو (مبایلجوړونې، ترکاڼۍ، موټرو انجن جوړونې، سلمه ګنډلو او غالۍ اوبدنې) حرفو کې تر عملي او نظري زده کړو وروسته د ماهرو کاریګرو په توګه د کار بازار ته وړاندې کړو. همدارنګه د کونړ ولایت څخه د یو بل خبر له مخې د کار او ټولنيزو چارو رياست په هڅو، د دې ولایت په مرکز اسعدآباد کې د مرستیال والي او یو شمېر نورو مسؤلینو په شتون کې پر ۲۰۰ تنو یتیمو او بې سرپرستو ماشومانو ژمني توکي ووېشل شول. هېره دې نه وي، چې د کونړ ولایت د کار او ټولنیزو چارو ریاست په هڅو د راسنتېدونکو ماشومانو د ملاتړ په موخه د مرستندویه مؤسساتو په همکارۍ ۱۰۵مرکزونه ایجاد کړي دي، ترڅو ماشومانو ته پکې د لومړنیو زده کړه برابره شي.
