په ارزګان کې د ۸۰ تنو په ظرفیت یو باب روزنتون پرانیستل شو
د ارزګان ولایت د کار او ټولنیزو چارو ریاست په هڅو؛ په مرکز ترینکوټ کې د ۸۰ تنو یتیمو او بېسرپرسته نجونو د حمایت لپاره یو باب روزنتون فعاله شو.
په همدې مناسبت جوړې شوې پرانیست غونډې ته د ارزګان ولایت د کار او ټولنیزو چارو رئیس الحاج قاري عزیزالله جهادمل په خپلو خبرو کې وویل: د دغه روزنتون په فعالېدو سره به یادو ماشومانو ته د ژوند سالم چاپیریال ترڅنګ د زدهکړو او سالمې روزنې زمینه برابره شي او د نورو اساسي اړتیاوو د پوره کولو لپاره به هغوی ته لازم خدمات وړاندې شي.
نوموړي د خپلو خبرو په دوام زیاته کړه، چې د کار او ټولنیزو چارو وزارت هڅه کوي، د یتیمو او بېسرپرسته ماشومانو د ملاتړ په برخه کې د ټولنې موجوده اړتیاوو په پام کې نیولو سره د زیان سره مخ اقشارو ستونزو د حل په موخه هلې ځلې وکړي او د هغوی ته مناسب چاپېریال برابر کړي.
د یادونې وړ ده، چې په یاده پرانیست غونډه کې د ارزګان ولایت امنیه قوماندان الحاج مولوي محمدرفیق خادم، د لواء قوماندان محترم شیخالحدیث بیضاوي، د ولایت مقام د کارکوونکو چارو امر مولوي عبدالسلام جیاد او د اقتصاد ریاست رئیس محترم مولوي ذبیحالله طالبیار هم حضور درلود.
