د ماشوم نړیوالې ورځې ویاړ غونډه جوړه شوه.
د کار او ټولنیزو چارو وزارت له خوا د غبرګولي یوولسمه د یوې لویې غونډې په جوړیدو سره و نمانځل شوه.
په همدې موخه جوړه شوې غونډه کې د کار او ټولنیزو چارو سرپرست سید انور سادات، د وزارت مرستیالانو، د چارو ادارې د فرهنګي چارو سلاکار میاګل وثیق، د شهیدانو او معلولینو په چارو کې د دولت وزارت مرستیال، د ماشومانو د ملاتړ بنسټونو یو شمیر استازو، د کار او ټولنیزو چارو وزارت رئيسانو، کارکوونکو او ګڼ شمیر وړکتونونو ماشومانو برخه اخیستې وه.
د کار او ټولنیزو چارو سرپرست سید انور سادات د خپلو خبرو په ترڅ کې ماشومانو ته د دې ورځې مبارکۍ تر څنګ، زیاته کړه، چې ماشومان د هیواد راتلونکي دي او والدین مکلف دي، چې د خپلو ماشومانو په ښه روزنه او پالنه کې جدي پاملرنه و کړي.
سید انور سادات زیاته کړه، چې د کار او ټولنیزو چارو وزارت د مختلفو ټولنیزو خدمتونو تر څنګ د ماشومانو پالنه هم د خپلو لومړنیو موخو څخه بولي او هڅه کوي، څو په وړکتونونو کې د دوی لپاره د ښې روزنې او پالنې زمینه برابره کړي، نوموړي زیاته کړه، چې له نیکمرغه د کار او ټولنیزو چارو وزارت د ماشومانو د ملاتړ قانون هم جوړ او اوسمهال په هیواد کې فافذ دی.
په غونډه کې د ټولنیزو چارو مرستیال غلام حیدر جیلاني هم خبرې و کړې، و یې ویل، چې اوس مهال په هیواد کې ۲۳ ډوله متضرره ماشومانو لرو، زیاته یې کړه، چې د کار او ټولنیزو چارو وزارت سربیره، ټول هیوادوال مکلف دي، څو د ماشومانو په ښه روزنه او د دوی لپاره د زده کړو د لازمو اسانتیاوو برابرولو په برخه کې هڅه و کړي.
غلام حیدر جیلاني وویل، چې د ماشومانو ساتنه په اصل کې د هیواد ساتنه ده؛ موږ باید د هیواد د ښې راتلونکې او پرمختګ لپاره په هیواد کې د ماشوم روزنې کلتور ته وده او زیاته پاملرنه و کړو.
همدارنګه په غونډه کې د چارو ادارې فرهنګي سلاکار او د ماشومانو د ملاتړ بنسټونو یو شمیر استازو هم خبرې و کړې او ماشومان یې د ټولنیې مهم قشر و باله، په روزنه کې یې د والدینو او استادانو رول مهم و باله، چې کولای شي په ښه توګه ماشومانو ته د هیواد پالنې مفکوره ور زده کړي.
د ویلو دی، چې د غونډې په ترڅ کې د وړکتونونو یو شمیر شاګردانو له خوا ملي سرود، ترانې هم ترسره شوې او غونډه د ماشومانو د ورزشي حرکتونو په ترسره کولو سره پای ته و رسیده.
