د څه باندې ۶۳ میلیونه افغانیو په مالي ارزښت د بې سرپرسته ماشومانو اړوند دیارلس هوکړه لیکونه لاسلیک شول.
په همدې موخه جوړه شوې غونډه کې د کار او ټولنیزو چارو سرپرست سید انور سادات وویل چې د دې هوکړه لیکونو د لاسلیک اصلي موخه د کار او ټولنیزو چارو وزارت او هغو موسساتو تر منځ چې د ماشومانو په برخه کې کار کوي، د کارونو لا ښه همغږي، د بې سرپرسته ماشومانو د زده کړې او د دوی لپاره د غوره خدمتونو وړاندې کول دي.
سید انور سادات وویل، چې د کار او ټولنیزو چارو وزارت د یوې مسؤلې ادارې په توګه تل هڅه کوي، څو بې سرپرسته ماشومانو ته د غوره زده کړو او اوسیدو زمینه برابره کړي، چې یاد هوکړه لیکونه هم د دوی لپاره د لا ښو خدمتونو وړاندې کولو په موخه لاسلیک شول.
نوموړي همدارنګه د ملي بانک استازي سره د هوکړه لیک لاسلیکولو په اړه وویل، چې د روزنتونونو بې سرپرسته ماشومانو لپاره بانکي اکونټونه جوړیږي او هغه مرستې چې له دوی سره کیږي، د دوی په اکونټونو کې ورته ساتل کیږي او تر اتلس کلنۍ وروسته کله چې ټولنې ته وړاندې کیږي، په خپلواکه توګه د خپل ژوند د پر مخ وړلو لپاره به یادې پیسې ورته ور کول کیږي.
سادات همدارنګه د رسنیو استازو څخه و غوښتل، څو د دغه قشر ماشومانو سره د کمک په برخه کې د دوی غږ لا ښه لوړ کړي، څو سوداګر او مؤسسې و هڅیږي، چې له بې سرپرسته ماشومانو سره لا زیاتې مرستې او همکاري و کړي.
د کار او ټولنیزو چارو سرپرست سید انور سادات د مؤسسو له ټولو استازو و غوښتل، څو یادو هوکړه لیکونو ته په پام، د روزنتونونو ماشومانو ته لا ښه خدمتونه وړاندې او هو کړه لیکونه په ښه توګه تطبیق کړي.
د ویلو دی، چې اوس مهال په هیواد کې ۶۷ دولتي او خصوصي روزنتونونه فعالیت لري، چې شا او خوا لس زره بې سرپرسته ماشومان په کې ساتل او روزل کیږي.
