د ښځو اقتصادي پياوړتیا او د ماشومانو د ساتنې اړوند د ظرفیت لوړونې برخو کې دوه بیلا بیل قراردادونه لاسلیک شول.
د کار او ټولنیزو چارو وزارت سرپرست د لپېس( LAPIS) شرکت استازي سره د (۱۶۲۷۵۰۰۰) افغانیو او یوې کاناډایي مؤسسې ( ICBR) استازې سره د ( ۳۵۴۵۲۱) ډالرو په ارزښت دوه بیلا بیل قراردادونه لاسلیک کړل.
په همدې موخه جوړه شوې غونډه کې د کار او ټولنیزو چارو وزارت سرپرست سید انور سادات وویل، چې د یادو قراردادونو پر بنسټ به د ښځو اقتصادي پياوړتیا پروګرام اړوند د عامه پوهاوي او ماشومانو د سکرتریت کارکوونکو د ظرفیت لوړولو مختلف پروګرامونه جوړ شي.
سید انور سادات د خپلو خبرو په ترڅ کې د کار او ټولنیزو چارو وزارت سره د مرسته کوونکو نړیوالو ادارو مرسته څخه د مننې تر څنګ وویل، چې د یادو قراردادونو مالي لګښت هم د نړیوال بانک او یونیسف ادارې له خوا ور کول کیږي.
په ناسته کې د لپېس( LAPIS) شرکت او ( ICBR) مؤسسې استازو هم د قراردادونو اړوند خبرې و کړې او ژمنه یې و کړه، چې د قراردادونو مطابق به خپل مسؤلیتونه ادا کړي.
