د ټولنیزو چارو معین د عامې روغتیا له وزیر سره وکتل
د کار او ټولنیزو چارو وزارت د ټولنیزو چارو معین الحاج مولوي عبیدالله امینزاده او ورسره مل پلاوي د عامې روغتیا له وزیر الحاج مولوي نورجلال جلالي سره وکتل.
په کتنه کې د دواړو لوریو لخوا د په روزنتونونو او حمایوي مرکزونو کې د مېشتو یتیمو او بېسربرسته ماشومانو او مېرمنو روغتیایي ستونزو ته د رسېدو او غوره درملنې، د روغتیایي خدمتونو د پراختیا او له زیان سره د مخ اشخاصو د ملاتړ په برخه کې د اقداماتو پر څرنګوالي تفصیلي بحث وشو.
د ټولنیزو چارو معین الحاج مولوي عبیدالله امینزاده په خپلو خبرو کې د عامې روغتیا له مسؤلینو څخه وغوښتل، چې د هېواد په سطحه روزنتونونو او حمایوي مرکزونو کې د یتیمو او بېسرپرسته ماشومانو او مېرمنو په غوره توګه درملنې ته پاملرنه وکړي.
ورپسې د عامې روغتیا وزیر هم په خپلو خبرو کې د کار او ټولنیزو چارو وزارت سره د هر راز همکاریو د ډاډ څرګندولو سربېره زیاته کړه؛ مونږ هڅه کوو، چې ټولو هېوادوالو ته په ځانګړي ډول له زیان سره د مخ اقشارو روغتیايي ستونزو ته په وخت سره رسېدنه او درملنه وکړو.
په پای کې هوکړه وشوه، چې په روزنتونونو او حمایوي مرکزونو کې د روغتیایي خدماتو په معیاري ډول د وړاندې کولو او تنظیم په موخه د دواړو وزارتونو ترمنځ د هوکړهلیک د مسودې د تدوین او نهايي کولو په منظور یوه ګډه کاري کمېټه رامنځته شي، ترڅو وروستي هوکړهلیک لاسلیک ته زمینه برابره شي.
