د عربي متحده ايالاتو سفیر سره د کار او ټولنيزو چارو وزير ليدنه
د کار او ټولنيزو چارو وزير بشير احمد ته ينج د افغانستان لپاره د عربي متحده ايالاتو سفير عيسی سالم محمد الظاهری سره و کتل. دې ناسته کې چې د کاري چارو مرستيال محمد اجمل شاه پور هم حضور درلود، دواړو لوريو د کار او ټولنيزو چارو وزارت سره د عربي متحده ايالاتو پر همکارۍ خبرې وکړې، د کار او ټولنيزو چارو وزير د عربي متحده ايالاتو سفير څخه و غوښتل؛ څو د کار او ټولنيزو چارو وزارت سره د فني او حرفوي زده کړو برخه کې همکاري او لکه د افغان ـ کوريا انستيتوت په څير د افغان ـ امارات د فني او حرفوي زده کړو انستيتوت جوړ کړي؛ نوموړي همدارنګه و غوښتل هغه روزنتون چې د کندهار ولايت عينو مېنه کې د اماراتو په مرسته جوړه شوې او د پروان ولايت روزنتون برخه کې هم له دې وروسته ورسره همکاري او مرسته وکړي، چې د عربي متحده ايالاتو سفير له لوري د همکارۍ ژمنه و شوه. پای کې دواړو لوريو د دوه اړخيزه همکاريو او د دواړو لوريو ترمنځ د کاري چارو پروسې پر اسانتيا ټينګار و کړ.
