د کار چارو مرستیال سره د ملګرو ملتونو نړیوال سازمان ( UN) اړوند ادارو مسؤلینو لیدنه
د کار چارو مرستیال مولوي مخدوم عبدالسلام سعادت د افغانستان لپاره د ملګرو ملتونو نړیوال سازمان ( UN) اړوند ادارو استازو سره خپل کاري دفتر کې و کتل.
په ناسته کې د ملګرو ملتونو نړیوال سازمان ( UN) اړوند ادارو( ILO, UNDP,UNCEF ) استازو د کار چارو مرستیال سره د لیدنې پر مهال، افغانستان کې د یادو ادارو موخو او کړنو اړوند معلومات شریک او د اسلامي امارت سره په ګډه همکارۍ یې د افغانانو لپاره د خدمتونو وړاندې کولو ژمنتیا و ښوده.
د کار چارو مرستیال مولوي مخدوم عبدالسلام سعادت د ملګرو ملتونو سازمان ادارو له مرستو څخه د مننې ترڅنګ زیاته کړه: د کار او ټولنیزو چارو وزارت په هیواد کې د کار، ټولنیزو چارو اړوند یو مسؤل وزارت دی، هڅه کوي، څو په کور دننه له ټولو ملي او نړیوالو ادارو سره په ګډه د بې کارۍ او بیوزلۍ ستونزو ته د حل لارې پيدا کړي.
نوموړي همدارنګه په هیواد کې د میرمنو حقوقو او کار، ماشومانو پر وضعیت او معتادینو ته د رسیده ګۍ اړوند هم خبرې و کړې او د ملګرو ملتونو نړیوال سازمان اړوند ادارو استازو ته په خطاب وویل، چې د افغانستان اسلامي امارت په چوکاټ کې د کار او ټولنیزو چارو وزارت ژمن دی، څو نړیوالو مرسته کوونکو ادارو ته د اصولو په چوکاټ کې د کار او فعالیت زمینه برابره او همکاري و کړي.
