د کړنو د ښې همغږۍ او چارو د لا ښه والي په موخه د يوې جامع طرحې ليکلو او ترتيب لپاره دویمه ناسته وشوه
په قندهار ناسته کې د عالیقدر اميرالمؤمنين په لارښوونه, دکارونو لا ښه والي، د کړنو د همغږۍ، او په ښه توګه د عوايدو را ټوليدو په موخه د يوې جامع طرحې جوړولو لپاره د کار او ټولنيزو چارو وزارت د مشرتابه د تیرې غونډې پر دوام د لسګونو کاري کمیټو د همغږۍ او انسجام لپاره دا ځل دکار او ټولنیزو چارو وزارت د مقام د دفتر رئیس مولوي شرف الدین شرف تر مشرۍ لاندې دویمه ناسته وشوه.
په دې ناسته کې د ګدايۍ مخنيوي، د سوالګرو او معتادينو را ټولولو، په هوايي ميدانونو کې بهرنيو وکړو ته د کار جواز رياست لا ښه فعاليت، له هيواده بهر د کارګرو حقوقو څخه دفاع، د فني او حرفوي زده کړو هغو فارغانو ته چې لا هم دندې نه لري د ډيتابيس جوړول، د کار بازار مطابق د فني او حرفوي زده کړو وړاندې کول، په ټول هيواد کې د وزارت اړوند کارکوونکو د ظرفيت لوړول، د کارموندنې او بې کارۍ د کمښت لپاره د جامعې طرحې جوړول او د ماشومانو د درندو کارونو څخه د مخنيوي په موخه د کورنيو او بهرنيو نهادونو ملاتړ، یې هغه لسګونه کاري کمیټې دي چې خپلې مفصلې طرحې په مشروح او بشپړ ډول ناستې ته وړاندې کړي.
په یاده ناسته کې د ټولو لسګونو کمیټو طرحو نیمګړتیاوې په ګوته شوې او د اصلاح او غوره والی لپاره یې وړاندیزونه او معقول نظریات شریک شول.
د یادولو وړ ده چې د لسګونو کمیټو ټولې طرحې به په نږدې راتلونکې کې به یوې جامع او ټولشموله عمومي طرحه کې توحید او منسجمې شي او د اسلامي امارت مشرتابه ته به د توشیح لپاره وړاندې شي.
