د کار او ټولنیزو چارو وزارت مالي او اداري مرستیال د غور والي سره ولیدل
د کار او ټولنیزو چارو وزارت مالي او اداري مرستیال مولوي دینمحمد حقبین نن په خپل کاري دفتر کې د غور ولایت له والي مولوي احمدشاه دیندوست سره ولیدل.
کتنه کې چې د یاد ولایت د کار او ټولنیزو چارو رئیس ملانصرالله انصار هم حضور درلود؛ مولوي دیندوست خپلو خبرو کې د غور ولایت ټولنیزې ستونزې له مولوي حقبین سره شریکې کړې او زیاته یې کړه چې غور ولایت کې د یتیمانو ستونزه لویه ده، د نجونو او هلکانو د دارالایتامونو تشکیل منظور شوی خو تعمیر نهلري.نوموړي په دې برخه کې د وزارت مشرتابه او د بهرنیو مؤسساتو د پاملرنې غوښتنه وکړه.
د کار او ټولنیزو چارو وزارت مالي او اداري مرستیال مولوي دینمحمد حقبین د غور ولایت د دارالایتامونو د ستونزې په حل کې د هر ډول همکارۍ ژمنه وکړه او زیاته یې کړه چې یاده ستونزه به د د افغانستان اسلامي امارت له مسؤلینو سره شریکه او په دې تړاو به د بهرنیو مؤسساتو مرستې هم وغواړي.
مولوي حقبین په پای کې زیاته کړه چې زموږ پالیسي دا ده چې لیرې پرتو سیمو او سرحدي ولایاتونو ته ډېره پاملرنه وشي ځګه پخوا د جګړو له امله ځپل شوي او یا هم محروم ساتل شوې وې.
