د کار چارو معین پکتیکا ته سفر وکړ
د کار او ټولنیزو چارو وزارت د کار چارو معین مولوي محمد زاهد احمدزي د یوه پلاوي په مشرۍ، پکتیکا ولایت ته رسمي کاري سفر ترسره او په یوه لویه ولسي غونډه کې یې ګډون او وینا وکړه.
دې غونډه کې چې د ولایتي ادارې مسؤلینو، علماي کرامو، قومي مشرانو او ځوانانو ګډون درلود؛ په پیل کې مرستیال والي مولوي مخدوم عبدالسلام سعادت خپله وینا کې مېلمنو ته د ښه راغلاست ویلو سربېره؛ څرګنده کړه: پکتیکا ولایت کې دمګړۍ د پلتوني اوبو بند د پروژې په ګډون ځینې ټولګټې پروژې د تطبیق په حال کې دي او ګڼ شمېر هېوادوالو ته یې په مستقیم او غیرمستقیم ډول د کار زمینه برابره کړېده، چې په بشپړېدو سره به یې هره برخه کې د پرمختګ شاهدان واوسو. له دې سره سره بیا هم د دې ولایت ځوانان د بیکارۍ له ستونزې سره مخ دي او هیله کېږي، چې اړونده ادارې په دې برخه کې لازمه پاملرنه وکړي. مخدوم سعادت د خپلو خبرو په دوام د دې ترڅنګ، چې د کار او ټولنیزو چارو وزارت فعالیتونه وستایل؛ دا غوښتنه وکړه، چې له هېواده بهر د افغان کاریګرو د اعزام موضوع دې تعقیب شي، ترڅو له دې لارې هم کاري فرصتونه برابر او د بیکارۍ په وړاندې مبارزه وشي.
ورپسې د مټاخان ولسوالۍ ولسوال مولوي ګلرحمان رشیدي هم خپله وینا کې د افغانستان اسلامي امارت له لوري مختلفو ولایتونو کې د مهمو او بنسټیزو پروژو د پلي کولو څخه په مننې سره؛ وویل: دا چې هېواد کې بشپړ امنیت ټینګ او د خدماتو رسولو لپاره مناسب فرصت برابر شویدی نو له اړونده ادارو مو غوښتنه ده، چې د پکتیکا- پکتیا سړک او د ښرنې او ولسوالیو ترمنځ د سړکونو د رغولو او د معارف د تقویت برخو ته لازمه پاملرنه وکړي، چې په دې سره به د ولسونو ډېری ستونزې حل او هم به مو ماشومان د علم په ګاڼه سمبال شي.
په همدې ترتیب قومي مشر حاجي اصل دین هم وینا درلوده او له ولایتي ادارې سره یې د پکتیکا د ولسونو له نږدې همکارۍ یادونه وکړه، نوموړي له مسؤلینو وغوښتل، چې دې ولایت ته ډېره پاملرنه وکړي او هم دې د خلکو ستونزو ته رسېدنه په خپلو کاري لومړیتوبونو کې ونیسي.
په پای کې د کار چارو معین الحاج مولوي محمد زاهد احمدزي خپلو خبرو کې وویل: خوښ یم چې د خپل کاري ټیم په ملتیا مې د جرګو او مرکو ټاټوبي پکتیکا ته رسمي کاري سفر ترسره او دلته مې د ټولنې له مختلفو اقشارو سره لیده کاته درلوده او هڅه به کوم ، چې د پکتیکا د درنو ولسونو غوښتنې او ستونزې د اړوندو ادارو سره د بحث ترڅنګ؛ له مشرتابه مقام سره به هم شریکوم. مولوي محمد زاهد احمدزي زیاته کړه: هیله مندیم چې له خپل حکومت سره لا ډېر همکار پاتې شئ او د چارو د بهبود او د خدماتو بهیر د چټکتیا په موخه وخت نا وخت خپلې سلا مشورې له مربوطه مسؤلینو او محلي ادارې سره شریکې کړئ. همداراز یې زیاته کړه، چې د کار او ټولنیزو چارو وزارت د بیکارۍ ستونزې سره د معقولې او مؤثرې مبارزې په منظور؛ مختلفې برنامې په لاره اچولي او هم ژمن دی، چې د کار ملي کانفرانس موخې تعقیب او عملي کړي، ترڅو هېوادوالو ته کاري فرصتونه رامنځته شي.
