هوډ لرو چې په محابسو کې د فني او حرفوي زدهکړو برنامې پیل کړو
د کار او ټولنيزو چارو وزارت، د کار چارو معین الحاج مولوي محمد زاهد احمدزي د ننګرهار ولایت د محبس له بېلابېلو برخو څخه لیدنه وکړه او د محبوسینو لپاره يې د فني او حرفوي زدهکړو د پلي کېدو په تړاو، د دې وزارت له هوډ څخه خبر ورکړ.
د کار چارو معین محبوسینو ته د سهولتونو د برابرېدو له امله، د زندانونو چارو د سمون ادارې څخه د مننې سربېره څرګنده کړه، چې د افغانستان اسلامي امارت تر حاکمیت وروسته له محبوسینو سره د اسلامي اصولو مطابق چلند کېږي او دا مراکز اوس د تعلیم او تربیې په مراکزو بدل شوي او د محبوسینو ستونزو ته تر ډېره بريده رسېدنه شوې، همداراز له محبوسینو وغوښتل؛ چې د تعلیمي او تربیوي برنامو څخه سالمه او اغېزمنه ګټه واخلي، ترڅو له بند وروسته، د یو مثبت بدلون لور ته ګام واخلي.
الحاج مولوي محمد زاهد احمدزي زیاته کړه: د کار او ټولنیزو چارو وزارت هوډ لري په محبسونو کې د کار بازار له اړتیاوو سره سم د فني او حرفوي زدهکړو زمینه برابره کړي، ترڅو محبوسین د دیني او عصري علومو تر څنګ، مسلکي مهارتونه هم ترلاسه کړي.
