سید عبدالکریم هاشمي د کار او ټولنیزو چارو وزارت د کاري چارو مرستیال په صفت دنده پيل کړه.
د کار او ټولنیزو چارو وزارت په وړاندیز او د جمهوري ریاست د عالي مقام په منظورۍ سید عبدالکریم هاشمي، د کاري چارو د نوي مرستیال په توګه د کار او ټولنیزو چارو وزیر فیض الله ذکي له خوا د دې وزارت کارکوونکو ته ور و پيژندل شو.
په همدې موخه جوړه شوې غونډه کې د کار او ټولنیزو چارو وزیر فیض الله ذکي د خپلو خبرو په ترڅ کې د کاري فرصتونو برابرولو، ذیدخله ادارو سره د همغږۍ او په ټوله کې د یو پالیسي جوړونکې معینیت په توګه د دې معینیت کارونو مهم و بلل او د دې معینیت د معین په صفت د ښاغلي هاشمي ګمارنه یې یو نیک اقدام یاد کړ؛ ښاغلي ذکي همدارنګه وویل، چې ښاغلی هاشمي وړاندې تر دې هم په مختلفو کاري برخو کې دندې تر سره کړي، نو په همدې اساس د وزارت د رهبري هیئت په وړاندیز او د جمهوري ریاست د عالي مقام په منظورۍ، د یاد معینیت مسؤلیت نوموړي ته و سپارل شو.
فیض الله ذکی د کاري چارو مرستیال ته د مبارکۍ تر څنګ سپارښتنه و کړه، څو د یاد معینیت او په ټوله کې د وزارت له کارکوونکو سره په پوره همغږۍ او همکارۍ کارونه ترسره کړي.
د کاري چارو مرستیال سیدعبدالکریم هاشمي د خپلو خبرو په ترڅ کې د وزارت له رهبري هیئت څخه پر ده د اعتماد او د یاد معینیت د دروند مسؤلیت ور سپارلو په اړه مننه و کړه، ژمنه یې و کړه، چې په پوره صداقت او ایماندارۍ به د خپل کاري ټيم سره د دې وزارت د کار معینیت په برخه کې خپل دنده ترسره کوي.
