د لوګر په ولایت کې د مولانا محمدیعقوب څرخي روزنتون پرانیستل شو
د کار او ټولنیزو چارو وزیر ملا عبدالولي څارنوال (حاجي وارث) په لارښوونه د یاد وزارت مالي او اداري مرستیال وزیر مولوي دین محمدحقبین د مولانا محمدیعقوب څرخي (ایسنا) روزنتون د پرانیست په مراسمو کې د ګډون لپاره ؛ لوګر ولایت ته سفر وکړ.
د کار او ټولنیزو چارو وزارت مالي او اداري مرستیال وزیر د پرانیست په غونډه کې د خپلو خبرو په ترڅ کې د کار او ټولنیزو چارو ولایتي ریاست، د لوګر ولایت مقام، د ایسنا همکاره مؤسسې او استراليا هیواد میشته مسلمانانو له هلوځلو او مرستو څخه د مننې ترڅنګ؛ ګډونوالو ته وویل: د اسلامي امارت اساسي اهداف د خدای په ځمکه؛ خدايي نظام اقامه، حق حقدار ته سپارل، د مسلمان له عزت، ناموس، دین، نسب، مال او کلتور څخه ساتنه، د ظالم مخنیوی او له مظلوم څخه دفاع، خلکو ته غوره خدماتو وړاندې کول او په یاده لاره کې د شهیدانو څخه پاتې یتیمانو او بې بضاعته ماشومان ملاتړ او ساتنه ده.
مولوي دین محمدحقبین په خپلو خبرو کې زیاته کړه چې د افغانستان اسلامي امارت موخه حکومت نه بلکه خلکو ته خدمت دی، د اسلامي امارت مسوولان په اصل کې د ولس خادمان دی او یتیم ته خدمت زموږ لمړیتوب دی.
په یادو مراسمو کې د لوګر ولایت مرستیال والي مولوي عنایت الله شجاع هم خبرې وکړې او زیاته یې کړه: د جهاد دورې د شهیدانو څخه پاتې یتیمو ماشومانو پالنه او روزنه او هغوی ته خدمت د مسوولینو لپاره ستر ویاړ او عظیم عبادت دی.
مولوي شجاع له مسوولینو وغوښتل چې له پرانیستو څخه وروسته فعالیتونو لپاره جدي توجه وکړي.
د یادولو وړ ده چې مولانا محمدیعقوب څرخي (ایسنا) روزنتون په ټولو مډرن وسایلو سمبال روزنتون دی چې د د استرالیا هیواد مسلمانانو په مالي لګښټ او د ایسنا مؤسسې په همکارۍ رغول شوې چې د ۲۰۰ تنو ماشومانو د پالنې او روزنې ګنجایش لري.
