د کار په انسټیټیوټ کې پر نصابونو او څیړنیزو موادو د بیاکتنې او پراختیا تر نامه لاندې درې ورځینی روزنیز پروګرام پیل شو
د کار او ټولنیزو چارو وزارت اړوند امارتي انسټیټیوټ کې د کابل، ښوونې او روزنې؛ کاردان، او رڼا پوهنتونونو او د علومو اکاډمۍ د استادانو په حضور او همکارۍ سره په نصابونو او څیړنیزو موادو د بیا کتنې او پراختیا تر سرلیک لاندې درې ورځینی روزنیز پروګرام پیل شو. په همدې مناسبت جوړه شوې غونډې ته د کار او ټولنیزو چارو وزارت د مهارتونو د پراختیا لوی رئیس مولوي رحیمالله صراح په خپلو خبرو کې وویل: په نصابونو او څیړنیزو موادو بیاکتنه د غوره کیفیت په لور یو غښتلي ګام دی او په دې ډګر کې به خپلې هلې ځلې لا ډیرې کړو ترڅو د فني او حرفوي زدهکړو په نصاب او بهیر کې بهتروالی راشي. ورپسې د کار او ټولنیزو چارو وزارت د کار انسټیټیوټ رئیس شریفالله شرافت په خپلو خبرو کې وویل: هڅه کوو ترڅو په کور دننه او نړیواله سطحه د کار بازارونو ته مسلکي کاریګر وروزو. شریفالله شرافت زیاته کړه: د کار انسټیټیوت توانیدلی چې په تېرو لسو میاشتو کې څه باندې زرو تنو امارتي او غیرامارتي ادارو کار کوونکو ته د ظرفیتلوړونې په برخه کې زدهکړې ورکړي.
