د سیلابونو له امله د پروان ولایت شل تنه بې سرپرسته او زیانمن شویو ماشومانو ته د ښوونې او روزنې زمینه برابره شوه
په همدې موخه د کار او ټولنیزو چارو وزارت نوي سرپرست بشیر احمد ته ینج په مشرۍ یو لوړ رتبه هیئت پروان ولایت ته سفر و کړ او د یاد ولایت له والي سره په کتنه کې یې د نوموړي ولایت ولسونو ته د سیلابونو له امله د مرګ ژوبلې په پار فاتحه او دعا و کړه.
له فاتحې وروسته د کار او ټولنیزو چارو وزارت سرپرست په هغه غونډه کې چې د بې سرپرسته ماشومانو د ساتنې او روزنې د هوکړه ليک لاسليک کېدو په موخه جوړه شوې وه، ګډون و کړ.
غونډه کې د پروان والي فضل الدین عیار، له کابل څخه ورغلي هیئت ته د ښه راغلاست، د کار او ټولنیزو چارو وزارت رهبرۍ او ټولو هیوادوالو څخه مننه و کړه، نوموړي وویل، چې پروان ولایت کې د وروستیو سیلابونو له امله د پروان ولایت ګڼ شمیر خلکو ته مالي او ځاني زیان رسیدلی، ښاغلي عیار د ټولو هیوادوالو، خصوصي سکتور په ځانګړې توګه د ولسمشر څخه مننه و کړه، چې د پروان ولایت د زیانمن شویو خلکو لاسنیوی یې و کړ او په وخت یې زیانمنو سره مرسته و کړه.
غونډه کې د پروان ولایت د کار او ټولنیزو چارو رئيس وکیل احمد سهیل، یاد ولایت ته د کار او ټولنیزو چارو وزارت رهبري هیئت سفر څخه مننه و کړه او د وروستیو سیلابونو له امله یې د دې وزارت اړوند د زیانمن شوي قشر د سروې او همدارنګه د بې سرپرسته ماشومانو د ساتنې او روزنې په پار د کار او ټولنیزو چارو ریاست طرحه شریکه کړه.
د کار او ټولنیزو چارو وزارت سرپرست بشیر احمد ته ینج، د خپلو خبرو په ترڅ کې د پروان ولایت د وروستیو سیلابونو له امله مرګ ژوبله یوه لویه غمیزه یاده کړه او دا یې د ټولو هیوادوالو مشترک درد یاد کړ، نوموړي زیاته کړه، چې د دې زیانمن شویو سره مرسته زموږ ټولو ایماني او انساني دنده دی.
ښاغلي ته ینج وویل: د افغانستان د ټولو خلکو خوشحالي او غم شریک دی، د پروان خلک د ځان يوازې نه احساسوي، ټول هیوادوال یې تر څنګ ولاړ او د سیلابونو له امله ور رسیدلي زیان په پار به ورسره همکاري کوي.
نوموړي همدارنګه زیاته کړه، چې د کار او ټولنیزو چارو وزارت رهبري تل ژمنه ده او د دې وزارت اړوند برخو( ټولنیز خوندیتوب او بې سرپرسته ماشومانو ساتنه او روزنه) کې به د پروان ولایت خلکو سره هر اړخیزه همکاري و کړي.
بشیراحمد ته ینج د زیانمن شویو او بې سرپرسته ماشومانو د ساتنې او روزنې په پار د پروان ولایت د کار او ټولنیزو چارو ریاست طرحه یوه جامع طرحه یاده کړه او ژمنه یې و کړه، چې د وزارت رهبرۍ سره به په ګډه د یادې طرحې د عملي کېدو په برخه کې هر اړخیزه هڅه و کړي.
همدارنګه د کار او ټولنيزو چارو وزارت سرپرست د ياد ولايت لپاره د روزنتون نوي جوړيدونکي کمپليکس له کارونو او د نوموړي ولايت يو وړکتون څخه هم ليدنه و کړه او د کارونو په اړه يې مسؤلينو ته لازمې لارښوونې و کړې.
غونډه کې د پروان ولایت د ولایتي شورا مشر او د غبار شمال خصوصي مؤسسې مسؤل هم خبرې و کړې، دوی د وروستیو سیلابونو له امله د پروان ولایت د زیانمن شویو خلکو لاسنیوي برخه کې د ټولو هیوادوالو څخه مننه و کړه او په دې برخه کې یې د دولتي او خصوصي سکتور د لا زیاتې همکارۍ غوښتنه و کړه.
د ویلو دی، چې په دې ناسته کې د کار او ټولنیزو چارو سرپرست او پروان والي په حضور کې د یاد ولایت د کار او ټولنیزو چارو رئيس د غبار شمال خصوصي لیسې مسؤل سره د یاد ولایت د وروستیو سیلابونو له امله شل تنه بې سرپرسته ماشومانو د ښوونې او روزنې هوکړه لیک هم لاسلیک شو، چې د یاد هوکړه لیک پر بنسټ به هغه شل تنه ماشومان چې والدین، خویندې او وروڼه یې د وروستیو سیلابونو له امله شهیدان شوي، په یاده مؤسسه کې به ورته د لیسانس تر کچې په وړیا ډول د ښوونې او روزنې زمینه برابره شي.
