د کار چارو معین د افغانستان صنایعو او معدنونو خونې له ځینو مسؤلینو سره وکتل
د کار او ټولنیزو چارو وزارت د کار چارو معین الحاج مولوي محمد زاهد، د افغانستان د صنایعو او معدنونو خونې له رئیس پرویز حیدري او مل پلاوي سره وکتل.
د افغانستان صنایعو او معدنونو خونې مسؤلینو د کار چارو معین سره په کتنه کې د خپلو ستونزو، ننګونو، لاستهراوړنو او راتلونکو پلانونو په اړه معلومات شریک او بهرنیو او کورنیو اتباعو ته د کار جوازونو په وېش کې یې د لا ډېرو اسانتیاوو غوښتنه وکړه.
الحاج مولوي محمد زاهد په خصوصي سکتور او په ځانګړي ډول د صنایعو او معدنونو خونې ته سپارښته وکړه، چې ټول بهرني او کورني وګړي باید د کار جوازونه ولري، ترڅو د هغوی کار قانوني شي. په راتلونکي کې خصوصي سکتور باید هڅه وکړي، چې د بهرنیو وګړو پر ځای کورني مسلکي کاریګر وروزي، ترڅو د بهرنیو وګړو استخدام ته په راتلونکي کې اړتیا پېښه نشي.
الحاج مولوي محمد زاهد همدا راز زیاته کړه، چې په ټوله نړۍ کې یوازې دولت نه شي کولای، چې د هغه هېواد ټول کاري ځواک په خپله اډانه کې جذب کړي، اوس په ټول هېواد کې هر ډول پانګه اچونې ته غوره شرایط برابر دي؛ نو دا د خصوصي سکتور دنده چې ډېری هېوادوالو ته په بېلابېلو برخو کې کاري فرصتونه برابر کړي.
په پای کې د صنایعو او معدنونو خونې رئیس د کار او ټولنیزو چارو وزارت له رهبرۍ څخه د هر اړخیزو سپارښتنو څخه د مننې سربېره د لا زیاتو همکاریو غوښتنه وکړه.
