د کار چارو معین د نشهیي توکو پر وړاندې د مبارزې د نوي معین په معرفي غونډه کې ګډون او وینا وکړه
د کار او ټولنیزو چارو وزارت؛ د کار چارو معین الحاج مولوي محمد زاهد احمدزي د نشهیي توکو پر وړاندې د مبارزې د نوي معین شیخ محمد قاسم خالد په معرفي غونډه کې ګډون او وینا وکړه.
غونډې ته د کار چارو معین په خپلو خبرو کې د نشهيي توکو له امله په ټولنه، اقتصاد او انساني قشر د رامنځته شویو ناوړو اغېزو د یادونې سربېره وویل: نشهیي توکي نه یوازې د عامو خلکو ژوند ګواښي، بلکې د هېواد د پرمختګ په وړاندې ستر خنډ هم ګڼل کېږي.
مولوي محمد زاهد احمدزي زیاته کړه: د افغانستان اسلامي امارت له بیاځلي حاکمیت څخه وروسته؛ تر دې دمه پورې له نشهیي توکو سره غوره مبارزه شوې، کښت او قاچاق یې مطلق بند شوی او ټولنې ته د مسؤل شخص په توګه له اعتیاد څخه رغېدلو پر بیاځلي ادغام باندې هم کار شوی دی؛ چې له نېکمرغه تر اوسه پورې په زرګونه رغېدلو هېوادوالو ته مو فني او حرفوي زدهکړې ورکړي او دا لړۍ په مرکز او ولایاتو کې دوام لري.
همداراز مولوي احمدزي ډاډ ورکړ، د ا.ا.ا په ځانګړي ډول د کار او ټولنیزو چارو وزارت چمتو دی، تر څو په ټولنه کې له اعتیاد څخه رغېدلو کسانو ته په مختلفو برخو کې د فني او حرفوي زدهکړو زمینه برابره کړي، چې په دې سره به دوی وکولی شي د دوامداره کار روزګار څښتن شي.
په پای کې نوموړي، د نشهيي توکو پر وړاندې د مبارزې نوي معین شیخ محمد قاسم خالد ته د مسؤلیت مبارکي وویله او له ټولو اړوندو ادارو یې د ګډ کار، په چارو کې د مؤثرې همغږۍ او ګټورو اقداماتو غوښتنه وکړه، څو د یادې پدیدې پر وړاندې اغېزناک ګامونه پورته شي.
