د کار او ټولنیزو چارو سرپرست وزیر د قطر شاهي هېواد د سوداګرۍ خونې له معاون سره ولیدل
د کار او ټولنیزو چارو سرپرست وزير الحاج ملاعبدالمنان عمري؛ قطر شاهي هېواد ته د خپل سفر په ترڅ کې نن د هغه هېواد د سوداګرۍ خونې له لومړي معاون ښاغلي محمد بن احمد الطوار الکواري او نورو مسوولينو سره په داسي حال کې ولیدل، چې په قطر شاهي هېواد کې د افغانستان اسلامي امارت سفیر ډاکټر نعیم وردګ هم حضور درلود.
ناسته کې د تجارت او اقتصاد په برخو کې د دوه اړخیزو اړیکو په پراختیا هر اړخیزې خبرې وشوې.
د کار او ټولنیزو چارو سرپرست وزیر الحاج ملا عبدالمنان عمري قطري سوداګر وهڅول چې په افغانستان کې د زراعت، صنعت، تولید او زیربنا په برخو کې پانګونه وکړي، ځکه د ملا عمري په وینا تر بل هر وخت اوس په افغانستان کې پانګې اچونې او دواړو دوستو هېوادونو اړیکو پراختیا ته ښه فرصت برابر دی.
په پای کې د کار او ټولنیزو چارو سرپرست وزیر د قطر شاهي هېواد له خصوصي سکتور مسوولينو څخه وغوښتل چې د افغانستان له خصوصي سکتور سره خپلې کاري او تجاري اړیکې پراخې کړي.
