د کار انسټېټوټ له خوا د امارتي کارکوونکو د مسلکي مهارتونو د پیاوړتیا په موخه ورکشاپ پیل شو
د کار او ټولنیزو چارو وزارت په هڅو د دې وزارت اړوند د کار په انسټیټیوټ کې د یوولسو مختلفو امارتي ادارو کارکوونکو ته د راپور لیکنې (گزارش نویسی) څلور ورځینی روزنیز ورکشاپ جوړ شول.
د ورکشاپ په پیل غونډې کې د کار او ټولنیزو چارو وزارت د کار انسټیټیوټ رئیس شریفالله شرافت په خپلو خبرو کې وویل: د کار او ټولنیزو چارو وزارت د خپلو نور مسؤلیتونو سربېره د امارتي او غیرامارتي ادارو د کارکوونکو د غوښتنو په اساس په مختلفو برخو کې د ظرفیت لوړونې لنډمهاله او اوږدمهاله عملي او نظري برنامې په لاره اچوي، ترڅو له دې لارې ګڼ شمېر کارکوونکو ورڅخه مستفید شي. شریفالله شرافت همداراز د خپلو راتلوونکو برنامو په اړه معلومات شریک او ژمنه یې وکړه، چې دا ډول روزنیزو او اغیزناکو برنامو ته به د وخت د غوښتنو په اساس دوام ورکوي.
نوموړي همدارنګه د دې ورکشاپونو له ګډونوالو وغوښتل، چې له دې پروګرام څخه د ترلاسهشویو تجربو او مهارتونو څخه په استفادې سره په ورځنیو چارو کې د بهبود ترڅنګ د ګټورو خدماتو په وړاندې کولو کې چټکتیا راولي.
