د سرحدونو، قومونو او قبایلو چارو له وزیر سره د همغږۍ ناسته وشوه
د کار او ټولنیزو چارو وزارت د کار چارو معین الحاج مولوي محمد زاهد احمدزي، بېرته راستنېدونکو هېوادوالو ته د کارموندنې د فرصتونو د برابرولو او ځینو نورو اړوندو مواردو په اړه د سرحدونو، قومونو او قبایلو چارو وزیر الحاج ملا نورالله نوري سره وکتل.
کتنه کې د کار چارو معین د دې وزارت د فعالیتونو او د کار ملي کانفرانس د ژمنو د تعقیب په اړه معلومات شریک او څرګنده کړه: له ګاونډیو هېوادونو څخه د ایستل شویو کډوالو د ځانګړنو، مهارتونو او وړتیاوو په اړه د کار او ټولنیزو چارو وزارت په خپل اړوند ډېټابېس کې معلومات راټول او د کارموندنې په موخه یې له ځینو امارتي ادارو سره لېستونه شریک کړي دي، چې دا لېست به د سرحدونو، قومونو او قبایلو چارو له وزارت سره هم شریک او هیله ده، چې په خپلو اړوندو برخو په ځانګړې توګه د انکشافي پروژو په تطبیق کې بېرته راستنېدونکو ته لومړیتوب ورکړي. مولوي احمدزي همداراز د کوچیانو او د دې وزارت اړوند لېسو د زدهکوونکو لپاره د کار او ټولنیزو چارو وزارت له لوري د فني او حرفوي زدهکړو د برنامو د جوړېدو څخه د همکارۍ ډاډ څرګند کړ.
د سرحدونو، قومونو او قبایلو چارو وزیر الحاج ملا نورالله نوري په مختلفو برخو کې د کار او ټولنیزو چارو وزارت له هڅو څخه په مننې سره، د دې ترڅنګ چې بېرته راستنېدونکو کډوالو ته د کاري زمینو برابرول ډاډ ورکړ، هیله یې وښوده، چې د فني او حرفوي زدهکړو برنامې دې د ځايي کوچیانو سربېره، سیارو کوچیانو ته هم په پام کې ونیول شي، ترڅو دوی هم له ورته برنامو مستفید شي. همداراز یې د دواړو وزارتونو ترمنځ د یوې ګډې کمېټې د جوړېدو یادونه وکړه، چې دا کمېټه به دنده لري اړونده چارې له نږدې تعقیب او وڅاري.
