د شا او خوا پنځه نيم ميليونه امريکايي ډالرو په ارزښت ۱۴ هوکړه ليکونه لاسليک شول.
د کار او ټولنيزو چارو وزير بشير احمد ته ينج د ۱۴ مؤسسو مشرانو او استازو سره د شا او خوا پنځه نيم ميليونه امريکايي ډالرو په ارزښت هوکړه ليکونه لاسليک کړل.
د کار او ټولنيزو چارو وزير بشير احمد ته ينج د خپلو خبرو په ترڅ کې وويل چې دغه هوکړه ليکونه به د کار رامنځ ته کولو په موخه د فني حرفوي زده کړو، د يتيمو او بې وزله ماشومانو ملاتړ او زيانمن شوي قشر ته د خدمتونو وړاندې کولو برخو کې د کار او ټولنيزو چارو وزارت او په ولايتونو کې د وزارت د دويمو واحدونو تر نظارت لاندې پلي شي.
د کار او ټولنيزو چارو وزير همدارنګه وويل، چې د دولت ترڅنګ موسسې د هيواد په اقتصادي پرمختګ کې مهم رول لري؛ نوموړي د موسسو له استازو و غوښتل؛ څو د هوکړه ليکونو تر چتر لاندې بروژې په ښه توګه پلې کړي.
دې ناسته کې د مؤسسو استازو هم خبرې و کړې او ژمنه يې و کړه، چې هوکړه ليکونه به د کار او ټولنيزو چارو وزارت سره په ښه همغږۍ پلي کړي.
د ويلو ده، چې دغه هوکړه ليکونه به د هيواد دولس ولايتونو (نيمروز، فارياب، سمنګان، جوزجان، هرات، بلخ، باميان، ننګرهار، بادغيس، کابل، فراه او غور) کې پلي او ۲۸۳۹۵ تنه هيوادل به ترې په مستقيمه توګه برخمن شي.
