۱۴۰۰ مالي کال کې کاپيسا ولايت ته د فني او حرفوي زده کړو برخه کې شپږ ميليونه افغانۍ ځانګړې شوي.
دغه خبره د کار او ټولنيزو چارو وزير بشير احمد ته ينج؛ کاپيسا ولايت ته د خپل کاري سفر په ترڅ کې د فني او حرفوي زده کړو څخه د شاګردانو فراغت غونډه کې و کړې.
په همدې موخه جوړو شويو مراسمو کې چې د کاپيسا والي ( عبدالطيف مراد) سربيره د کار او ټولنيزو چارو وزير بشير احمد ته ينج، د ټولنيزو چارو مرستيال غلام حيدر جيلاني او ورسره مل پلاوي هم په کې ګډون درلود، په ترڅ کې يې ۲۴۰ تنه فارغانو( انجونې او هلکان) ته فراغت پاڼې و ويشل شوې.
ناسته کې د کاپيسا والي عبدالطيف مراد د خپلو خبرو په ترڅ کې محمودراقي ته، د کار او ټولنيزو چارو وزارت رهبرۍ راتګ يو نيک ګام ياد کړ؛ د وزارت رهبرۍ ته يې د ښه راغلاست ترڅنګ د کاپيسا ولايت د کار او ټولنيزو چارو رياست ستونزې او وړانديزونه د وزارت رهبرۍ سره شريک او د حل غوښتنه يې وکړه.
د کار او ټولنيزو چارو وزير بشير احمد ته ينج د کاپيسا والي او خلکو خبرو اوريدلو وروسته وويل: موږ هڅه کوو، څو د مرکز علاوه، خپل ولايتي رياستونه هم د ښو خدمتونو وړاندې کولو برخه کې فعال و ساتو؛ نوموړي زياته کړه: له ولايتي سفرونو څخه مو موخه هم له نږدې د خپلو ولايتي رياستونو څخه نظارت او د هغوی ستونزو ته په وخت او ښه رسيدل دي.
بشير احمد ته ينج د وړکتونونو، رزنتونونو او ماشومانو د ملاتړ مرکز برخو کې د کاپيسا خلکو د غوښتنو اړوند وويل، چې ۱۴۰۰ مالي کال کې هڅه کوو؛ څو د لا زياتو فني او حرفوي زده کړو په وړاندې کولو او بهر ته د افغان کارګرو په ليږلو سره په کور دننه د کار بازار باندې فشار کم او لا زيات مسلکي کسان و روزو.
نوموړي وويل چې ۱۴۰۰ مالي کال کې کاپيسا ولايت ته د فني او حرفوي زده کړو ښوونيزو صنفونو لپاره (۳.۵) ميليونه افغانۍ او د شاګرد استادۍ برخه کې هم (۲.۵) ميليونه افغانۍ ځانګړې شوي دي.
دې ناسته کې د ټولنيزو چارو مرستيال غلام حيد جيلاني هم د کار او ټولنيزو چارو وزارت د راتلونکو پلانونو اړوند خبرې وکړې او د کاپيسا ولايت د کار او ټولنيزو چارو رياست د کړنو د لا ښه ملاتړ او تجهيز برخه کې يې ژمنه و کړه.
همدارنګه فراغت غونډه کې د ولايتي شورا رييس او د فارغانو په استازيتوب هم شاګردانو خبرې وکړې؛ دوی فني او حرفوي زده کړې د کارموندنې او ځان بسياېنې برخه کې ګټورې و بللې او د ورته کورسونو جوړولو غوښتنه يې وکړه.
د ويلو دی، چې د کار او ټولنيزو چارو وزير او مل پلاوي د کاري سفر په ترڅ کې د محمودراقي روزنتون څخه هم ليدنه وکړه؛ د رورنتون استادانو او شاګردانو ستونزې يې واوريدې؛ ستونزو د حل ژمنه يې وکړه او هم يې د روزنتون له شاګردانو سره نقدي مرسته وکړه.
