کار او ټولنیزو چارو وزارت کې د یو باب مسجد د بنسټ ډبره کېښودل شوه
کار او ټولنیزو چارو وزارت کې د ارشاد، حج او اوقافو وزارت د استازي په شتون کې د یو باب مسجد د بنسټ ډبره کېښودل شوه.
په همدې موخه جوړو شویو مراسمو کې د کار او ټولنیزو چارو وزیر بشیر احمد ته ینج، د کاري چارو مرستیال محمد اجمل شاه پور، د ټولنیزو چارو مرستیال غلام حیدر جیلاني، د مالي او اداري چارو مرستیال مسعود الله اوریاخیل، یو شمیر رئيسانو، آمرینو او کارکوونکو ګډون کړی وه.
د یاد مسجد د بنسټ د ډبرې ایښودو مراسمو کې د کار او ټولنیزو چارو وزیر بشیر احمد ته ینج وویل: دا مسجد به د نوي زره امریکایي ډالرو او د کار او ټولنیزو وزارت رهبرۍ، رئيسانو، ټولو مرکزي او ولایتي کارکوونکو د دوه میلیونه افغانیو ګډې مرستې په شمول، ۱۴۴ متر مربع ساحه کې جوړ شي؛ نوموړي زیاته کړه، چې یاد مسجد به د اودسونو ځای او په یو وخت د ۱۲۰ تنه ( د نارینه او میرمنو لپاره) لمونځ کوونکو ځای و لري، چې په راتلونکو پنځو میاشتو کې به جوړ شي.
ښاغلي ته ینج زیاته کړه: ځینو خیرخواه مشرانو او سوداګرو هم د دې مسجد د جوړیدو برخه کې د همکارۍ ژمنه کړې.
دې مراسمو کې د ټولنیزو چارو مرستیال غلام حیدر جیلاني د قرآن کریم او حدیثو په رڼا کې د دې نیک کار او مسجد جوړیدو په اړه خبرې و کړې او د هر ډول همکارۍ ژمنه یې و کړه.
د مراسمو پای کې د ارشاد، حج او اوقافو د مسجدونو برخې معاون د کار او ټولنیزو چارو وزارت رهبرۍ او کارکوونکو دغه نیک کار و ستایه؛ ژمنه یې و کړه، چې ارشاد، حج او اوقافو وزارت به هم د دې مسجد د جوړیدو برخه کې د خپلو وظیفوي او امکاناتو په محدوده کې همکاري و کړي.
