د کار او ټولنیزو چارو په وزارت کې د خوځښت، غوره همغږۍ او چارو د لا ښه والي په موخه د يوې جامع طرحې د انسجام او توحید لپاره ناسته وشوه
د افغانستان د اسلامي امارت د مشرتابه او د ریاست الوزراء په لارښوونه، د کار او ټولنیزو چارو وزارت کې د خوځښت او په ټولو کاري چارو کې د پوره همغږۍ او غوره والی لپاره د يوې جامع طرحې جوړولو لپاره د کار او ټولنيزو چارو وزارت د مشرتابه د تیرې غونډې پر دوام د لسګونو کاري کمیټو د همغږۍ او انسجام لپاره دا ځل هم دکار او ټولنیزو چارو وزارت د سرپرست وزیر ملا عبدالولي څارنوال (حاجی وارث) تر مشرۍ لاندې، د کار ي چارو مرستیال وزیر مولوي مخدوم عبدالسلام سعادت، د مالي او اداري چارو مرستیال وزیر مولوي دین محمد حقبین، د وزارت محترم مقام دفتر رییس مولوي شرف الدین شرف او نورو اړونده ریاستونو په ګډون دریمه ناسته وشوه.
په دې ناسته کې د کار او ټولنیزو چارو سرپرست وزیر ملا عبدالولي څارنوال (حاجی وارث) وویل چې د وزیرانو شورا په وروستۍ غونډه کې پریکړه وشوه چې د اسلامي امارت هره اداره مکلفه دي چې خپلې اړونده مقررې، لوایح، طرزالعملونه او طرحې په هر اړخیز ډول وڅیړي او هغه مادې، فقرې او موارد پیدا کړي چې د اسلامي امارت له پالیسیو او شریعت سره په ټکر کوي، خپله جرحه ورباندې ولیکي او د اصلاح او تعدیل لپاره د دوو میاشتو په بهیر کې د اسلامي امارت مشرتابه پلاوي او ریاست الوزراء ته ولیږي.
په دې ناسته کې د کار او ټولنیزو چارو وزارت اړوندو ټولو مقررو، لوایحو، طرزالعملونو د څیړلو او نظارت لپاره د کاري چارو مرستیال وزیر مولوي مخدوم عبدالسلام سعادت، تر مشرۍ لاندې یو لس کسیزه کمیسیون ته دنده وسپارل شوه د متخصصینو، کارپوهانو، علماوو او شیوخو نظریات هم واخلي او چې یاد شوې موارد په غور وڅیړي.
په یاده غونډه کې مالي او اداري چارو مرستیال وزیر مولوي دین محمد حقبين وویل چې په ټولو موضوعاتو کې زموږ لپاره اهم موضوع د تشکیل ده چې بايد ریاست الوزراء محترم مقام د اداري چارو مرستیال مولوی عبدالسلام حنفی سره نهایي شي ځکه چې په ټول هیواد باندې د اسلامي امارت په واکمنیدو سره په هیواد کې امن راغلی او پکار ده چې زموږ د وزارت خدمات د هیواد ټولو لریو پرتو سیمو ته وغځول شي؛ چې د دې کار لپاره زیاتو منابعو او مسلکي پرسونل ته اړتیا لیدل کیږي.
د یادولو وړ ده چې په غونډه کې د لسګونه کاري کمیټو طرحو څخه؛ شپږو کمیټو خپلې مفصلې طرحې په مشروح او بشپړ ډول ناستې ته وړاندې کړي او بیاد هم د کاري چارو مرستیال وزیر مولوي مخدوم عبدالسلام سعادت، تر مشرۍ لاندې لس کسیزه کمیسیون ته دنده وسپارل شوه چې یادې شپږې طرحې په هر اړخیز ډول وڅیړي او په پایله کې یوه منسجمه او جامع طرحه ترې ترتیب کړي ترڅو د ریاست الوزراء مقام ته د توشیح لپاره ولیږل شي.
