د کار او ټولنیزو چارو سرپرست وزیر په مشرۍ د ټولنیز خوندیتوب سکتور لومړنۍ ناسته ترسره شوه
د کار او ټولنیزو چارو وزارت سرپرست الحاج ملا عبدالمنان عمري په مشرۍ او د اړونده امارتي ادارو د استازو په ګډون د ټولنیز خوندیتوب سکتور لومړنۍ ناسته ترسره؛ او په کې د یاد سکتور د غړو ترمنځ د ښې کاري همغږۍ او شته ستونزو ته د رسیدګۍ په اړه مفصل بحثونه وشول.
ناسته کې د اطلاعاتو او کلتور وزارت نشراتي معین مولوي حیاتالله مهاجر فراهي، د کار او ټولنیزو چارو وزارت مقام د دفتر رئیس ملا شرفالدین شرف، او د شپاړسو نورو امارتي ادارو استازو چې (د ټولنیزخوندیتوب سکتورغړیتوب لري) ګډون درلود.
ګډونوالو ته د ښه راغلاست ویلو وروسته د کار او ټولنیزو چارو سرپرست وزیر خپلو خبرو کې وویل: ټولنیزو چارو کې ډېرې ادارې دخیلې او مسؤلیتونه لري، چې د ټولنې اړمن او مظلوم قشر ته رسیدګي یې له عمده دندو څخه دي او دا چې د کار او ټولنیزو چارو وزارت په مستقیم ډول پدې برخه کې ښکېل دی نو غوره وبلل شوه چې نننۍ ناسته جوړه او په کې د نورو همکاره ادارو سره په مشترک ډول اړمنو ته د ښو او با ارزښته خدماتو د وړاندې کولو څرنګوالی وارزوي پردې سربېره د ادارو ترمځ د ګډې همکاری لپاره هم زمینه برابره شي.
ورپسې د دې وزارت د ټولنیزو تأمیناتو د تنظیم رئیس شریف الله شرافت څرګنده کړه: چې د افغانستان د اسلامي امارت د ریاست الوزراء عالي مقام د حکم په اساس د کار او ټولنیزو چارو وزارت په مشرۍ او د اړونده امارتي ادارو په ګډون د دې ناستو لړۍ پیل شوه، نوموړي د پرېزنټېشن له لارې؛ د فقر او بیوزلئ مخنیوی، د هېواد په کچه د څارنې او راپور ورکولو د میکانیزم جوړېدل، د حمایوي او انکشافي پلانونو پلي کېدل، د اداراتو، خصوصي سکتور او مؤسساتو ترمنځ همغږي او د ملي پالیسی ایجاد یې د ټولنیزخوندیتوب سکتور اهداف او مکلفیتونه وبلل.
په همدې ترتیب د اطلاعاتو او کلتوز وزارت نشراتي مرستیال، د اقتصاد، د سرحداتو، قومونو او قبایلو، زراعت او اوبولګولو، پوهنې او شهیدانو او معلولینو چارو وزارتونو، د چاپېریال ساتنې ملي ادارې او د کابل ښاروالۍ استازو ناسته کې خپل نظریات او وړاندیزونه شریک او د خپلو ادارو له همکاریو ډاډ څرګند کړ.
هغوی په ملي کچه د یوه مشترک د یوه معلوماتي مرکز( ډېټابېس) چې په کې د اړمنو کسانو په اړه لازم معلومات موجود وي اړین وبلل او هم یې د یوه واحد چتر، چې له لارې یې په راتلونکي کې د بشري مرستو وېش په شفاف ډول پرمستحقینو ترسره شي؛ غوښتنه درلوده د دې ترڅنګ د چارو د ښه پرمختګ لپاره د ځینو کمیټو د ایجاد یادونه هم وشوه.
د بحثونو جمعبندۍ کې د کار او ټولنیزو چارو وزارت سرپرست وزیر الحاج ملاعبدالمنان عمري د ذیدخله ادارو سره د دې ناستو په تعقیب ټینګار وکړ او د معلوماتي مرکز د جوړېدو څخه د هرکلي ترڅنګ د موازي حرکتونو د مخنیوي په موخه یې د ادارو ترمنځ نږدې او ښه همغږي اړینه وبلله. همداراز یې څرګنده کړه، چې پدې اړه به د ریاست الوزارء مقام د اقتصادي معاونیت سره هم د ناستې زمینه برابره شي.
