د کار او ټولنیزو چارو رئیس د یوناما ختیځ زون مسوول او د ننګرهار ولایت له یوشمېر ځوانانو سره ولیدل
دننګرهار ولایت د کار او ټولنیزو چارو رئیس مولوي فریدالله حقاني د یوناما ختیځ زون له رئیس او د ننګرهار ولایت د بیلابیلو ولسوالیو له یوشمېر ځوانانو سره مشورتي ناسته وکړه.
ناسته کې یادو ځوانانو غوښتنه درلوده چې دوی ته دې د فني او حرفوي زدهکړو زمینه برابره برابره شي ترڅو وکولای شي له دې لارې د خپلو کورنیو ملاتړ وکړي او له بلې خوا د کار بازار کې رغنده ونډه واخلي.
افغانستان لپاره د ملګرو ملتونو د ځانګړي ماموریت ( یوناما) د ختيځ زون رئیس ښاغلي رومل خپلو خبرو کې د دې ترڅنګ چې د داډول ناستو د جوړېدو څخه خوښي څرګنده کړه، ژمنه یې درلوده چې د خپل مرکزي دفتر په مرسته به هڅه وکړي چې ځوانانو ته د کارموندنې او ځینو نورو د اړتیا وړ برخو کې پروژې پلي کړي.
په همدې توګه د ننګرهار ولایت د کار او ټولنیزو چارو رئیس مولوي فریدالله حقاني هم د ناستې ګډونوالو ته څرګنده کړه چې د افغانستان اسلامي امارت ژمن دی چې خپلو ځوانانو ته کاري فرصتونه برابر کړي، مولوي حقاني زیاته کړه چې هڅه کوو چې د فني او حرفوي زدهکړو مراکزو کې د جذب کچه لوړه شي ترڅو زیات شمېر ځوانان وکولای شي فني او حرفوي زدهکړې ترلاسته او د کار بازار کې شریک شي.
د یو بل خبر له مخې دننګرهار ولایت د کار او ټولنیزو چارو ریاست اړوند د الندوي روزنتون ۴۰۴ تنو یتیمو زدهکوونکو سره د وامي مؤسسې په مرسته د ژمنیو جامو او بوټانو مرسته وشوه. مولوي فریدالله حقاني د وامي مؤسسې له مرستې څخه په مننې سره، روزنتون کې د شاملو ماشومانو څخه وغوښتل چې خپلو درسونو ته لازمه پاملرنه ولري، ترڅنګ له خیرو اشخاصو او نورو مؤسساتو هم وغوښتل چې د یتیمانو د لاسنیوي په موخه دې خپل مرستې زیاتې کړي.
