د کار او ټولنیزو چارو وزارت دوه تنه نوي ګمارل شوي معینان خپلو دندو ته معرفي شول
د عالیقدر امیرالمؤمنین شیخ القرآن والحدیث مولوي هبةالله اخندزاده د جلاجلا حکمونو په اساس د کار او ټولنیزو چارو وزارت د ټولنیزو چارو او کار چارو معینان، خپلو دندو ته وپېژندل شول.
هغه ناسته چې په همدې مناسبت د کار او ټولنیزو چارو په وزارت کې جوړه شوې وه او په کې د دې وزارت سرپرست وزیر الحاج ملا عبدالمنان عمري، د چارو ادارې لوی رئیس شیخ نورالحق انور، د وزارت مالي او اداري معین مولوي دینمحمد حقبین، رئیسانو او کارکوونکو ګډون درلود، لومړی د کار او ټولنیزو چارو وزارت سرپرست الحاج ملا عبدالمنان عمري خپلو خبرو کې مېلمنو ته د ښه راغلاست ویلو ترڅنګ د وزارت د کاري استقامت، مسؤلیتونو او لاستهراوړنو په اړه وینا ترسره او څرګنده کړه چې کار او ټولنیزې چارې د دې وزارت دوه مهمې برخې دي ځکه چې یوه یې د ټولنې مظلوم قشر ته د خدماتو عرضه او بل یې هغو هېوادوالو ته چې د حلال رزق په لټه کې وي د کاري فرصتونو برابرول او د اسلامي امارت د اداراتو ترمنځ د کارونو د پرمختګ په برخه کې د اصولو او قواعدو ترتیب دی.
د کار او ټولنیزو چارو وزارت سرپرست زیاته کړه که د دې وزارت ملاتړ او تقویت وشي د هېواد په کچه د ټولنې ډېرو برخو ته رسیدنه کیږي او ولسونو ته به د ښو خدماتو د ترسره کولو زمینې برابرې شي؛ چې پدې رابطه هڅې او فعالیتونه دوام لري، ترڅو خپلو موخو او اهدافو ته رسیدګي وکړو، په پای کې یې نویو ګمارل شویو معینانو ته د مبارکۍ سربېره؛ د پوره همکارۍ ډاډ څرګند کړ.
ورپسې د چارو ادارې لوی رئیس شیخ نورالحق انور د ټولنیزو چارو د معین په صفت د شیخ عبدالبر د تقرر په اړه د عالیقدر امیرالمؤمنین حفظهالله ۲۴۹ګڼه حکم او د کار چارو د معین په توګه یې د مولوي محمد زاهد جان آغا د تقرر په اړه ۲۵۱ګڼه حکم قرائت او دوی ته په چارو کې د بریا هیلهمندي وکړه. په همدې توګه یې څرګنده کړه چې یاد ګمارل شوي معینان وړ او په کاري مسایلو پوه اشخاص دي چې وبه توانیږي خپل مکلفیتونه او دندې په ښه توګه ادا او ولسونو ته غوره خدمات ترسره کړي.
په همدې ترتیب د کار او ټولنیزو چارو وزارت د ټولنیزو چارو معین مولوي عبدالبر هم لنډه وینا ترسره او ژمنه یې وکړه، چې پخپل ټول توان به هڅه کوي چې د چارو په ښه پرمختګ او د خدماتو د وړاندې کولو په لارو کې به د خپل کاري ټیم سره یوځای هېڅ راز هڅې و نه سپموي.
په پای کې د کارچارو نوي ګمارل شوي مرستیال مولوي محمد زاهد جان آغا هم خپلو خبرو کې وویل چې ورکړل شوی مسؤلیت به د صداقت، عدالت او شفافیت اصولو سره سم پرمخ بیايي، او دې کار ته ژمن دی ترڅو هېواد کې د بېکارۍ کچې راکمولو کې له شته امکاناتو پوره ګټه واخلي.
