د کار او ټولنیزو چارو سرپرست وزیر د سنټ پټرزبرګ په اقتصادي سرمشریزه کې د ګډون په موخه روسیې ته ورسید؛
د کار او ټولنیزو چارو سرپرست وزیر الحاج ملا عبدالمنان عمري د افغانستان اسلامي امارت په استازیتوب د روسیې هېواد د سنټ پټرزبرګ په ۲۷مه اقتصادي سرمشریزه کې، چې د روان میلادي کال د جون له ۵مې څخه تر ۸مې نیټې پورې جوړيږي؛ د ګډون په موخه هغه هېواد ته ورسېد.
د کار او ټولنیزو چارو سرپرست وزیر به په یاده اقتصادي سرمشریزه کې؛ له د سیمې او نړۍ هېوادونو سره د بالفعله او بالقوه اقتصادي او سوداګریزو فرصتونو په اړه د وینا سربیره، دګڼ شمېر هېوادونو او سیمهایزو او نړیوالو سازمانونو له استازو سره هر هم لیدنې ولري او د علاقې وړ موضوعګانو په اړه به بحثونه وکړي.
د یادولو وړ ده چې د سنټ پټرزبرګ اقتصادي سرمشریزه له ۲۷ کلونو راهیسې د روسیې په اقتصادي پلازمېنه سنټ پټرزبرګ کې د لسګونو زره میلمنو په حضور کې جوړیږي؛ او د نړۍ په بیلابیلو اقتصادي ارزښتمنو مسائلو خبرې کیږي او همدارنګه په یاده سرمشریزه کې د اقتصاد او تجارت په برخو کې تړونونه لاسلیک کیږي.
