کاپیسا کې له فني او حرفوي زدهکړو څخه ١٢٠ تنه ځوانان فارغ او ١٥٠ تنه نور جذب شول؛
د کار او ټولنیزو چارو وزارت د کار چارو معین مولوي محمد زاهد احمدزي د یوه پلاوي په مشرۍ کاپیسا ولایت ته پخپل سفر کې له فني او حرفوي زدهکړو څخه د ځوانانو په فراغت غونډه کې ګډون او وینا وکړه.
ياده غونډه کې چې د کاپیسا مرستیال والي او ځینو رئیسانو، علمای کرامو او قومي مشرانو ګډون درلود؛ د دې ولایت د کار او ټولنیزو چارو رئیس مولوي عزتالله عارف مېلمنو ته د ښه راغلاست سربېره وویل: ١٢٠ تنه ځوانان د مبایل ترمیم، د کورنیو برقي وسایلو ترمیم، خیاطۍ او د موټرو د ماشین جوړولو له حرفو څخه تر شپږو میاشتنیو عملي او نظري زدهکړو څخه فارغ او د وزارت مقام د پاملرنې په اساس ١٥٠ تنو نورو ته ورته زمینه برابره شوه. مولوي عارف د خپلو خبرو په دوام د ځينو شته ستونزو د حل په برخه کې د کار چارو د معین د همکارئ غوښتنه هم وکړه.
ورپسې د کار چارو معین مولوي محمد زاهد احمدزي خپله وینا کې څرګنده کړه: هېوادوالو په ځانګړې توګه ځوان نسل ته د کارموندنې او بیکارۍ کچې کمښت په منظور مختلفې برنامې په لار اچول شوي او هم د کار ملي کانفرانس د موخو د تعقیب په منظور هڅې روانې دي. مولوي احمدزي زیاته کړه: د خوښۍ ځای دی، چې نن په کاپیسا ولایت کې د خپلو هېوادوالو په خدمت کې یو او د ځوانانو په فراغت غونډه کې د ګډون ویاړ لرو. همداراز يې د ماشومانو د تعلیم او تربیې په موخه په نږدې راتلونکي کې د کاپیسا ولایت لپاره د یوه باب وړکتون د پرانیستې څخه یادونه او هم یې د دې ریاست د ستونزو د حل په موخه د پاملرنې ډاډ څرګند کړ.
په همدې ترتیب د کاپيسا مرستیال والي شیخ اسدالله سنان هم غونډې ته وینا وکړه او مختلفو ساحو په خاص ډول ځوانانو ته د کار موندنې په برخو کې يې د کار او ټولنیزو چارو وزارت هڅې او فعالیتونه وستايل او هم یې په دې اړه د ولايت مقام د نږدې همکارۍ تعهد درلود.
ورپسې په فارغو شويو ځوانانو د فراغت سندونه توزیع او په راتلونکي ژوندانه کې ورته د لابریاوو هیله مندي وشوه.
د غونډې پای کې د کار چارو معین د کاپیسا د کار او ټولنیزو چارو ریاست اړوند روزنتون کې د مېشتو یتیمو او بې سرپرستو ماشومانو او د فني او حرفوي زدهکړو مرکز له ښوونیزو ټولګيو څخه هم لیدنه وکړه او د چارو د ښه پرمختګ لپاره يې مسؤلینو ته ځينې سپارښتنې وکړې.
د ويلو ده چې دې سفر کې د بشري قواوو عمومي رئيس، د فني او حرفوي زدکړو د مرکزونو د تنظیم رئیس او د مطبوعاتو رئيس، د کار چارو له معین سره ملتيا کوله.
