د کار چارو معین په افغانستان د کار نړیوال سازمان له رئیس سره تودیعي کتنه وکړه
د کار او ټولنیزو چارو وزارت د کار چارو معین الحاج مولوي محمد زاهد احمدزي د خپل کار دفتر کې، افغانستان کې د کار نړیوال سازمان له رئیس ډاکټر رامین بهزاد سره تودیعي کتنه وکړه.
په کتنه کې ښاغلي بهزاد افغانستان کې د دې سازمان د فعالیتونو په اړه معلومات شریک او ډاډ یې ورکړ، چې د هغه له تګ وروسته به هم د کار نړیوال سازمان د کار او ټولنیزو چارو وزارت سره خپله همکاري او همغږي پیاوړې ساتي او هڅه به کوي، چې په مختلفو برخو په ځانګړې توګه د بېکارۍ کچې په راټیټولو، ځوانانو ته دکاري فرصتونو او افغانستان کې د غوره کار په ترویج کې مثبت رول ولوبوي. نوموړي همدا راز په افغانستان کې د کاري شرایطو د بهبود او کارموندنې په برخو کې د کار او ټولنیزو چارو وزارت وروستي فعالیتونه او هڅې وستایلې.
ورپسې د کار چارو معین الحاج مولوي محمد زاهد احمدزي په خپلو خبرو کې د کار نړیوال سازمان له هلوځلو څخه د مننې سربېره؛ ډاکټر رامین بهزاد ته د ستاینلیک په ورکولو سره په تیرو ۴ کلونو کې افغانستان کې د نوموړي د فعالیتونو قدردانی وکړ او د ژوند په نورو چارو کې ورته د لابریاوو غوښتونکی شو.
