شېرخان بندر کې بهرنیو وګړو ته د ثبت او راجستر مدیریت برېښنايي سیستم پرانېستل شو
د کار او ټولنیزو چارو وزارت په هڅو؛ د کندز ولایت اړوند شېرخان بندر کې بهرنیو وګړو ته د ثبت او راجستر مدیریت په برخه کې برېښنايي سیستم پرانېستل شو.
په پرانېست غونډه کې د کندز ولایت د کار او ټولنیزو چارو رئیس مولوي احمدشاه حقاني په خپلو خبرو کې وویل: شېرخان بندر د هېواد په سطحه د اقتصاد، ترانزیټ، نړیوالو اړیکو، او سیمهییز پرمختګ یو حیاتي محور دی، چې پکې بهرنیو وګړو ته د ثبت بریښنایي سیستم رامنځته کول نورې اسانتیاوې هم راولي.
مولوي حقاني زیاته کړه؛ برېښنايي حکومتولي د نظم، سهولت او شفافیت په رامنځته کېدو او د وخت ضایع کېدو د مخنیوي او په خپل وخت مراجعینو ته د چټکو خدماتو د وړاندېکولو په لارو کې اړینه او هم د وخت اړتیا ده.
د یادونې وړده، چې په مرکز او ولایاتو کې د کار او ټولنیزو چارو وزارت له لوري په مختلفو برخو کې بریښنایي سیستمونه رامنځته شوي دي، ترڅو هېوادوالو ته د خدماتو په وړاندې کولو کې اسانتیاوې رامنځته شي.
