د کونړ اسد آباد روزنتون زدهکوونکو سره د ژمنیو جامو مرسته وشوه
د کار او ټولنیزو چارو وزارت پلاوي، کونړ ولایت ته په خپل سفر کې د دې ولایت د اسد آباد روزنتون پر زدهکوونکو ژمنۍ جامې وویشلې او هم یې د قرآن عظیم الشأن له ناظره دورې څخه فارغانو ته ډالۍ ورکړې.
ناسته کې د کونړ ولایت مرستیال والي مولوي عبدالله حقاني مېلمنو ته ښه راغلاست ووایه او د یتیمو او بېسرپرستو ماشومانو څخه د ملاتړ په برخه کې یې د کار او ټولنیزو چارو وزارت هڅې او فعالیتونه و ستایل او هم یې له روزنتون سره د ولایت مقام د همکارۍ ډاډ څرګند کړ.
په همدې ترتیب د کار او ټولنیزو چارو وزارت د مهارتونو د پراختیا لوی رئیس، مولوي رحیمالله صراح هم خپلو خبرو کې د اسلام مبارک دین له نظره یې د یتیمو ماشومانو د کفالت په اړه رڼا واچوله او څرګنده یې کړه، چې له نېکمرغه د کونړ ولایت د اسد آباد روزنتون ۲۰ تنو زدهکوونکو د قرآن عظیم الشأن له ناظره دورې او ۱۴ تنو د ښوونځي له متوسطې دورې فراغت حاصل کړ او هم ۱۳۰ تنو زدهکوونکو سره د ژمنیو جامو مرسته وشوه.
ورپسې د مطبوعاتو د رئیس سمیعالله ابراهیمي، د انسټیټوټ د رئیس شریفالله شرافت، د کار چارو معینیت د دفتر مسؤل محمد منیر باور او د کونړ ولایت د کار او ټولنیرو چارو ریاست د مسؤلینو له لوري پر زدهکوونکو تایید نامې او جامې ووېشل شوې.
د یادولو ده چې دمګړۍ په ټولو ولایتونو کې د کار او ټولنیزو چارو وزارت له لوري روزنتونونه فعال او شاوخوا ۱۰ زرو یتیمو او بېسرپرستو ماشومانو ته په کې د ژوندانه ټول سهولتونه چمتو شوي دي او هغوی ته دیني او عصري زدهکړې ورکول کېږي.
