د کار عالي شورا نوبتي ناسته ترسره شوه
د کار او ټولنیزو چارو وزارت؛ د کار چارو معین الحاج مولوي محمد زاهد احمدزي په مشرۍ، نویو بېرته راستنېدونکو هېوادوالو ته د کاري فرصتونو د پنځولو لپاره د طرحو د ایجاد په موخه د کرنې، اوبولګولو او مالدارۍ وزارت د فني او مسلکي چارو معین مولوي صدراعظم عثماني، د کانونو او پټرولیم وزارت د مالي او اداري چارو معین مولوي حسامالدین صابري، د مسلکي او تخنیکي تعلیماتو اداري معاون مولوي غلام سعید احسان، د صنعت او سوداګرۍ وزارت او د خصوصي سکتور استازو په ګډون پنځمه نوبتي ناسته وکړه.
په کتنه کې د ټولو اړخونو په همغږۍ سره د بېلابېلو برنامو د تطبیق له لارې په هېواد کې د بېکارۍ کچې په راټیټولو، د کار بازار اړتیا ته په کتو د نویو شغلونو د ایجاد او راستنېدونکو هېوادوالو ته د کارموندنې فرصتونو پر څرنګوالي، د تولیدي او زېربنایي پروژو د پراختیا، د بهرنیو وګړو پرځای د داخلي ماهرو مسلکي وکړو ته په استخدام کې لومړيتوب، د خصوصي سکتور او دولتي ادارو ترمنځ د غوره همغږۍ او په هېواد کې د صادراتو لوړولو او وارداتو کچې په راکمولو تفصیلي خبرې وشې.
د کار چارو معین الحاج مولوي محمد زاهد احمدزي په خپلو خبرو کې د همکارو امارتي او غیر امارتي ادارو له مسؤلینو څخه وغوښتل، چې د کار او ټولنیزو چارو وزارت سره په همغږۍ خپلو امکاناتو ته په کتو په خپل استخدام کې نویو راستنېدونکو هېوادوالو ته لومړیتوب ورکړي.
ورپسې د امارتي ادارو او خصوصي سکتور استازو هم په خپل وار سره هېوادوالو ته د کارموندنې په برخه کې خپلې مشورې شریکې او د همکارو ادارو په همغږۍ سره د هر ډول همکاریو ډاډ څرګند کړ.
په پای کې پرېکړه وشوه، چې د نویو شغلونو د ایجاد د طرحي د کتنې، د کډوالو د پیژندنې، د مهارتونو د تثبیت او د کار بازار سره د پیوستون او راستېدونکو هېوادوالو ته د کاري فرصتونو د ایجاد په موخه د کار او ټولنیزو چارو وزارت په سرپرستۍ سره د صنعت او سوداګرۍ، د کانونو او پترولیم وزارتونو، د تخنیکي او مسلکي زدهکړو اداري او خصوصي سکتور له لوري د غوره همغږۍ په موخه کېمټه جوړه شي؛ ترڅو په چارو کې انسجام او نظم رامنځته شي.
