د کار او ټولنیزو چارو وزارت سرپرست وزیر د جمهوري ریاست عالي مقام د دوهم مرستیال سرور دانش له خوا معرفي شو.
د افغانستان اسلامي جمهوري ریاست عالي مقام د حکم پر بنسټ، سید انور سادات د کار او ټولنیزو چارو سرپرست وزیر په توګه معرفي او په کار پيل و کړ.
هغه غونډه چې په همدې موخه د کار او ټولنیزو چارو وزارت کې جوړه شوې وه، په کې د جمهوري ریاست عالي مقام دوهم مرستیال سرور دانش، د کابینې یو شمیر غړو، د یو شمیر وزارتونو مرستیالانو، ملي شورا کې د خلکو یو شمیر استازو، د وزارت رهبري هیئت او د وزارت ګڼ شمیر کارکوونکو ګډون کړی وه.
په پیل کې د کار او ټولنیزو چارو سرپرست وزیر په توګه د سید انور سادات د تقرر حکم د جمهوري ریاست د عالی مقام د دفتر مرستیال ویس هدایت له خوا و لوستل شو او ور پسې د کار او ټولنیزو چارو مخکني وزیر فیض الله ذکي په خپله کاري دوره کې د خپلو کړنو او لاسته راوړنو په اړه خبرې و کړې او د نوي سرپرست وزیر په توګه د سید انور سادات ګمارنه یې پر ځای اقدام یاد کړ او نوموړي ته یې په کارونو کې د بریالیتوب هیله و کړه.
د جمهوري ریاست عالي مقام دوهم مرستیال سرور دانش بیا د کار او ټولنیزو چارو مخکني وزیر کړنې و ستایلې او نوموړی یې یو نیک، په کار پو او ښه شخصیت یاد کړ، ښاغلي دانش همدارنګه وویل، چې د کار او ټولنیزو چارو وزارت د یو پالیسي سازه ادارې په توګه په تیرو څو کلونو کې د قوانینو او مقررو په برخه کې کار کړی دی، خو د تطبیق په برخه کې لا زیات کار ته اړتیا ده، چې باید تر سره شي.
سرور دانش د کار او ټولنیزو چارو وزارت د سرپرست په توګه د سید انور سادات معرفي کیدو تر څنګ د دې وزارت د نوې رهبرۍ سره د ملي یووالي حکومت همیشه ګۍ همکارۍ ژمنه تازه کړه، سید انور سادات یې یو مناسب او توانا شخص یاد کړ او نوموړي ته یې د الله ج له درباره په کارونو کې د لا زیاتو بریاوو غوښتنه و کړه.
د کار او ټولنیزو چارو نوي سرپرست وزیر بیا د خپلو خبرو په ترڅ کې د جمهوري ریاست عالي مقام د اعتماد څخه مننه و کړه او ژمنه یې و کړه، چې کارونه به د وزارت له همکارانو سره په ښه توګه مخته یوسي.
په پای کې هم د کار او ټولنیزو چارو نوی سرپرست وزیر د جمهوري ریاست عالي مقام د دوهم مرستیال سرور دانش او یو شمیر نورو لوړ رتبه چارواکو له خوا د کار تر دفتر بدرګه او رسما یې په کار پيل و کړ.
