تیره یوه میاشت کې د کار او ټولنیزو چارو وزارت حمایوي مرکزونو له لارې ۳۰ تنه متضرره ماشومانو ته خدمتونه وړاندې شوي دي.
د کار او ټولنیزو چارو وزارت د ماشومانو ساتنې ریاست مشر نجیب الله اخلاقي د ماشومانو ساتنې شبکې (CPAN) په ناسته کې د دې خبرې په څرګندولو سره زیاته کړه، چې د کار او ټولنیزو چارو وزارت تل په دې هڅه کې دی، چې د ماشومانو ساتنې په برخه کې د دخیلو ادارو سره په همکارۍ ۲۳ ډوله متضرره ماشومانو ته اړین خدمتونه وړاندې او دغه شمیره را کمه کړي.
ښاغلي اخلاقي د خپلو خبرو په ترڅ کې د ټولو هغو مؤسسو او ادارو له استازو څخه چې د ماشومانو په برخه کې کار کوي، و غوښتل، څو متضرره ماشومانو ته د خدمتونو وړاندې کولو او د ماشومانو ساتنې قانون پلي کولو په برخه کې له کار او ټولنیزو چارو وزارت سره هر اړخیزه همکاري و کړي.
په دې ناسته کې چې د کار او ټولنیزو چارو وزارت کې جوړه شوې وه، د ماشوم ساتنې شبکې (CPAN) غړو د ماشومانو هفتې د نمانځنې پر څرنګوالي هر اړخیز بحث و کړ او د همکارۍ ژمنه یې و کړه.
