افغان ـ کوريا د فني او حرفوي زده کړو انستيتوت کې د شاملېدو په موخه له شا او خوا زر تنه انجونو او هلکانو څخه آزموينه واخيستل شوه.
د ازموينې پرانسته کې د کار او ټولنيزو چارو وزارت سرپرست بشير احمد ته ينج؛ د ځوانانو نوم ليکنه او آزموينه کې برخه اخيستنه د مهارتونو زده کولو او کارموندنې په برخه کې يو ښه چانس ياد کړ، له شاګردانو يې و غوښتل؛ څو ياد مرکز ته په بريالي کېدو سره له وخت څخه په ګټنې، په ښه توګه خپل درسونه مخ ته يوسي؛ څو خپلې کورنۍ او ټولنې ته د خدمت مصدر و ګرځي.
د کار او ټولنيزو چارو سرپرست همدارنګه وويل چې د افغانستان دولت په ځانګړې توګه د کار او ټولنيزو چارو وزارت ژمن دی؛ څو د فني او حرفوي زده کړو شپږ مياشتنيو او يو کلنو کورسونو په جوړولو سره ځوانانو ته کسب ور زده او د کارموندنې په برخه کې ورسره همکاري و کړي.
د آزموينې پرانسته کې د آفغان ـ کوريا د فني او حرفوي زده کړو انستيتوت آمر ميرجلال الدين هشام وويل: په دې آزموينه کې شا او خوا زر تنه انجونو او هلکانو ګډون کړی دی، چې تر آزموينې وروسته به ۱۵۰ تنه هغه کسان چې لوړې نمرې تر لاسه کړي؛ دريو ( کمپيوټر، خياطي او انګليسي) څانګو کې به و نيول شي.
همدارنګه د کار او ټولنيزو چارو سرپرست د آزموينې تر نظارت وروسته د ياد انستيتوت د کارموندنې او نورو څانګو څخه ليدنه و کړه او د تدريسي بهير او ښو خدمتونو وړاندې کولو په برخه کې يې مسؤلينو ته لازمې لارښوونې و کړې.
د ويلو دی، چې تيره اونۍ هم د افغان ـ کوريا د فني او حرفوي زده کړو انستيوت له دريوو( کمپيوټر، انګليسي او خياطي) څانګو څخه ۱۴۰ تنه انجونو او هلکانو د فراغت تصديق پاڼې تر لاسه او ټولنې ته د خدمت په موخه وړاندې شول.
