د افغانستان اسلامي امارت د ادارې کمیسیون مشر مولوي عبدالسلام حنفي، په مشرۍ یو پلاوی، چې په عین حال کې افغان مهاجرینو ستونزو او ننګونو ته د رسېدنې عالي کميسيون مسئولیت هم پرغاړه لري، د تورخم  ښارګوټي عمري پنډغالي ته سفر وکړ، ترڅو هلته له پاکستان هېواد څخه راستنېدونکو هېوادوالو ستونزې او ننګونې له نږدې وګوري او دحل په موخه یې لازم اقدامات وکړي.

ملا عبدالسلام حنفي، راستنېدونکو هېوادوالو ته د هرکلي ويلو ترڅنګ زیاته کړه: افغانستان اسلامي امارت د مسئول دولت په توګه ژمن دی، چې هر افغان وګړي په ځانګړي توګه نويو راستنېدونکو هېوادوالو ته د ژوند د اسانتياوو په رامنځته کولو کې کوټلي ګامونه پورته کړی او په مؤقتي او دايمي توګه د هغوی مېشتيدو، سرپناه، کاروبار، وقایې  او ناروغانو ته د‌درملنې سهولتونه برابر کړي.

د کار او ټولنیزو چارو وزارت د کار چارو معین او د کارموندنې کميټې رئيس چې د پلاوي په ترکيب کې تورخم ښارګوټي ته تللی، راستنېدونکو هېوادوالو ته په خطاب کې وویل: د ا.ا.ا او په ځانګړي توګه د کار او ټولنیزو چارو وزارت ژمن دی، چې تر خپلې وسې پورې ستاسو ته د کار او فعاليت زمینه برابره کړې او په همدې موخه د‌ معلوماتو ذخیرې سيستم کې ستاسو تخصص، تجربه، تعليم او تحصيل او همدارنګه ستاسو مسلک ثبتوو، ترڅو په راتلونکي کې ور څخه په استخدام کې استفاده وکړو.

د يادونې وړ ده، چې د‌ پلاوي په ترکيب کې د کډوالو او بېرته راستېدونکو وزارت په ګډون د‌ نورو امارتي ادارو استازي هم شامل دي.