د بهرنیو چارو په وزارت کې؛ بهر ته د افغان کاریګرو د لېږد په اړه د همغږۍ ناسته تر سره شوه
د کار او ټولنیزو چارو د سرپرست وزیر الحاج ملا عبدالمنان عمري په مشرۍ، بهر ته د افغان کاریګرو د لېږد او همدارنګه هلته شته کاریګرو افغانانو ته د نورو لازمو کاري آسانتیاوو د رامنځته کولو په موخه د همغږۍ ناسته وشوه.
په ناسته کې د بهرنیو چارو سرپرست وزیر؛ مولوي امیرخان متقي، د احصایې او معلوماتي ملي ادارې رئیس عبدالقاهر حاجي ادریس، د کورنیو چارو وزارت مرستیال مولوي محمد نبي عمري او د عامې روغتیا وزارت مرستیال مولوي حمدالله زاهد ګډون درلود.
بهر هېوادونو کې افغان کاریګرو ته د کاري زمینې برابرولو او هلته موجودو افغان کاریګرو ستونزو ته د رسېدلو په تړاو بحثونه وشول.
په ناسته کې پرېکړه وشوه؛ چې بهر ته په قانوني ډول د افغان کاریګرو د لیږد بهیر د ګړندي کولو، هلته د میشتو افغان کاریګرو د اسنادو د تحلیل او غوره تنظیم او کاروبار کې د نورو لازمو آسانتیاوو د رامنځته کولو او هغوی له خپلو حقوقو څخه د خبرولو لپاره یو پنځه اړخیزه هوکړهلیک ترتیب شي؛ ترڅو د هغې مطابق هر اداره په دې تړاو خپل مکلفیتونه په ښه توګه اداء کړي.
د یادولو ده، چې یاده پنځه اړخیزه ناسته د عالیقدر امیرالمؤمنین حفظه الله د حکم په اساس تنظیم شوې ده، ترڅو بهر ته د افغان ماهرو کاریګرو د قانوني لېږد لپاره؛ د حرفو تثبیت، روغتیا، پېژندپاڼو او نورو اسنادو په ترتیب کې هره اداره د خپل مسؤلیت مطابق فعالیت تر سره کړي.
