د صنعتکارانو، سوداګرو او د باروړونکو اتحادیو د استازو ترمنځ د تفاهم ناسته وشوه
د کار او ټولنیزو چارو وزیر الحاج ملا عبدالمنان عمري په مشرۍ, د ریاست الورزاء عالي مقام د اقتصادي مرستیال مشاور مولوي عبدالولي رحمت، د ماليې وزارت مرستیال مولوي عبدالمتین سعید، د ترانسپورت او هوايي چلند مرستیال مولوي عبدالسلام حیدري په ګډون د صنعتکارانو، سوداګرو او د باروړونکو موټرو د اتحادیو د استازو ترمنځ د باروړونکو وسايطو د نوبت د طرزالعمل د غوره تطبیق په موخه د تفاهم او همغږۍ ناسته تر سره شوه.
په پیل کې ټولو لوريو د باروړونکو وسايطو د نوبت د طرزالعمل په غوره تطبیق خپلې سپارښتنې، وړانديزونه، مشورې او شکایات شریک کړل.
ګډونوالو ته په خطاب کې د کار او ټولنیزو چارو وزیر الحاج ملا عبدالمنان عمري وویل: بهتره ده چې د افغانستان اسلامي امارت د امیرالمؤمنین حفظهالله تعالی د هدایت په اساس د درېیو لوریو د ګټو تضاد په ټولو پریکړو کې په جدي توګه په پام کې ونیول شي، پخواني او نوي ماډل باروړونکو وسايطو ترمنځ په فعالیت کې توازن رامنځته شي، د صنعتکار او د سوداګر دواړو ګټو د نظر د نیولو ترڅنګ عامه ګټو ته لومړیتوب ورکړل شي. د کرايو له لوړوالي او انحصار مخنیوی وشي، تجارتي اموال په خپل وخت د هېواد له ټولو بندرونو په ټاکلي وخت, هدف ته ورسول شي، د سوداګر او موټر چلوونکي ترمنځ د کمېشنکارانو مخه ډب شي او په پای کې هر لوی تجارتي شرکت باروړونکي موټر يوازې د خپل مربوطه شرکت اموال انتقال کړي.
په پای کې پرېکړه وشوه، چې د راتلونکې ناستې لپاره ټول لوري خپل وړانديزونه، سپارښتنې، شکایتونه او مشورې په کتبي او تفصیلي ډول ترتیب کړي، ترڅو د نهايي حللارې لپاره زمينه برابره شي.
هېره دی نه وي چې د صنعتکارانو، سوداګرو او د باروړونکو اتحادیو ترمنځ د کلنو کشالې د حل په موخه د کار او ټولنیزو چارو وزیر په مشرۍ او د نورو اړوندو امارتي ادارو او اتحادیو په غړیتوب د امیرالمؤمنین حفظهالله تعالی په هدایت کمیسیون ټاکل شوی دی.
