د طرحو او پروګرامو اړوند اداري ناسته
د ۱۴۰۰ لمریز کال اړوند د نویو طرحو او پروګرام لپاره د کار او ټولنیزو چارو وزارت د بیلابیلو برخو رئیسانو او مسؤلینو سره لومړنۍ اداري ناسته وشوه.
لومړی؛ د کار او ټولنیزو چارو وزیر بشیر احمد ته ینج د وزارت په کاري موخو او پروګرامونو خبرې وکړي، د وزارت له مرستیالانو او رئیسانو څخه یې وغوښتل تر څو د کارونو د ښې همغږۍ او چټکتیا په موخه د ۱۴۰۰م کال اړوند کاري طرحې او پروګرامونه د وزارت له مشرتابه سره شریکې کړي.
همدا راز د کاري چارو مرستیال غلام حیدر جیلاني، د مالي او اداري چارو مرستیال مسعود اوریاخیل په خپل وار خپلې کاري طرحې او پروګرامونه د وزارت له مشرتابه سره شریکي او د هرې برخې رئیسانو د موضوعاتو د تشریح تر څنګ خپل نظریات هم سره شریک او پر ګډه همغږۍ یې ټینګار وکړ.
په پای کې یوشمیر رئیسانو او د بیلابیلو برخو مسوولېنو د ځینو پروګرامونه او پلانونو د نه پلې کیدو پر وړاندې شته خنډونه او ستونزې د وزارت له مشرتابه سره شریکې کړي چې د کار او ټولنیزو چارو وزیر هم د هوارۍ په موخه یې اړونده مسؤلینو ته اړینې لارښونې وکړې.
