د ماشومانو حقونو څخه د ملاتړ تخنیکي کمېټې دویمه ناسته جوړه شوه.
دغه ناسته چې د کار او ټولنیزو چارو وزارت سرپرست سید انور سادات په مشرۍ جوړه شوې وه، په کې د ماشومانو حقونو څخه د ملاتړ کمیټې د کارونو مخته وړلو لایحې، پارلمان کې د ماشوم قانون اړوند جنجالونو او د دې قانون د عامه پوهاوي اړوند هر اړخیز بحث و شو.
د کار او ټولنیزو چارو وزارت سرپرست سید انور سادات د جلسې ګډونوالو ته د ښه راغلاست تر څنګ پارلمان کې د ماشومانو څخه د ملاتړ قانون پر سر د جنجالونو په اړه معلومات وړاندې کړل، زیاته یې کړه، چې د دې ستونزې د حل په موخه یې د پارلمان مشر، مرستیالانو او یو شمیر غړو سره لیدلي دي، نوموړي همدارنګه د یاد قانون د تصویب په موخه د تخنیکي کمیټې له ټولو غړو و غوښتل څو پارلمان کې د یاد قانون د تصویب کیدو برخه کې همکاري و کړي.
په ناسته کې د ټولنیزو چارو مرستیال غلام حیدر جیلاني هم خبرې و کړې، نوموړي د ماشومانو څخه د ملاتړ قانون د تصویب په برخه کې د ذیدخلو وزارتونو او ادارو همکاري مهمه و بلله او له ټولو یې و غوښتل څو د ماشومانو څخه د ملاتړ کمیټې کارونو برخه کې په ولایتي سطحه هم خپلو مسؤلینو ته سپارښتنې و کړي.
په دې ناسته کې د ګڼ شمیر وزارتونو او ادارو مرستیالانو او استازو هم برخه اخیستې وه، دوی هم د وزارت رهبرۍ سره، پارلمان کې د یو شمیر وکیلانو له خوا د ماشومانو څخه د ملاتړ قانون پر سر جنجالونو، د تخنیکي کمېټې د کارونو د لایحې او قانون په اړه د عامه پوهاوي اړوند هر اړخیز نظرونه شریک کړل، دوی د تخنیکي کمېټې د کارونو پر مخ وړلو لایحه د ماشومانو ستونزو ته په وخت رسیدو برخه کې مهمه و بلله او په دې برخه کې یې د همکارۍ ژمنه و کړه.
سید انور سادات د غونډې په جمع بندۍ کې وویل، چې موږ باید د هیواد اوسني وضعیت ته په کتو سره پر عملي مکانیزمونو کار و کړو، ځکه چې قانون لرو، مسؤلیتونه هم مشخص دي او د حکومت رهبرۍ ملاتړ هم شته، نو په دې اساس د قانون په رڼا کې باید ګوټلي ګامونه واخلو.
سید انور سادات د تخنیکي کمېټې له غړو څخه د مننې تر څنګ، په ولایتي سطحه د دوی د همکارۍ غوښتنه و کړه، نوموړي همدارنګه زیاته کړه، چې د ولایتي کمېټو برخه کې باید له سیمه ایزو ارګانونو ادارې سره هم باید همغږي و شي، څو په ولایتي سطحه د یادو کمېټو مشري والیان مخته یوسي، نوموړي زیاته کړه، چې په ولایتي کمېټو کې باید د غیرې دولتي ادارو او مؤسسو استازو ته چې د ماشومانو برخه کې کار کوي، هم باید برخه ور کړل شي.
