د کارګر حقوق یوازې په اسلامي شریعت کې خوندي دي
د کار او ټولنیزو چارو وزیر الحاج ملاعبدالمنان عمري د کارګر نړیوالې ورځې په مناسبت جوړې شوې غونډې ته په خپلې وینا کې وویل: د نړۍ ټولو حقوقي نظامونو په پرتله یوازې اسلامي شریعت دی؛ چې پوره یې د کارګر حقوق خوندي کړي دي.
د کار او ټولنیزو چارو وزیر الحاج ملا عبدالمنان عمري زیاته کړه: په هېواد کې ډېری محوري مرکزونه یا بنسټونه زیانمن شوي و، چې له هغو څخه یو د کارګرانو او کارکوونکو ملي اتحادیه ده چې پخوا یې له نوم او ارزښتونو څخه ناوړه استفاده شوې وه او په ټولنه کې یې خپل اعتبار بایللی وو.
الحاج ملا عبدالمنان عمري زیاته کړه: اسلامي امارت دا برخه بیا ورغوله او هڅه دا ده، چې د دې اتحادیې اعتبار بیا جوړ او کارګرانو ته د خدمت جوګه شي او د یو ټولینز شریک په توګه د کار او ټولنیزو چارو وزارت سره یوځای د کارګرانو له حقوقو څخه دفاع وکړي.
ملا عبدالمنان عمري د خبرو په دوام څرګنده کړه، د کار او ټولنیزو چارو وزارت ژمن دی، چې له دې اتحادیې سره په همکارۍ د کارګرانو ستونزو ته رسېدنه وکړي او په دې برخه کې ذیدخله ادارې او خصوصي سکتور په ګډه کار وکړو، ترڅو کاري فرصتونه رامنځته شي.
د ا.ا.ا د ریاستالوزراء عالي مقام هم د کارګر نړیوالې ورځې په مناسبت په خپل پیغام کې چې د کار او ټولنیزو چارو وزارت مالي او حسابي رئیس مولوي احمدالله رفیق له لوري قرائت شو؛ امارتي او خصوصي سکتور ته په هدایت کې ویلي وو، چې خپلو اوسنیو هڅو او کوښښونو ته ادامه ورکړي؛ په کاري چاپېریال او ټولنه کې د کارګرانو حقوق په پوره توګه رعایت کړي؛ د هغوی صحت او خوراک ته پاملرنه وکړي، د تفریح او رخصتۍ حقوق یې تأمین او په ټوله کې پرېنږدي؛ چې د هغوی کوچنی حق هم تر پښو لاندې شي.
د کارګرانو او کارکوونکو اتحادیې سرپرست رئیس مولوي عبدالمتین مولويزاده په خپله پرانیستونکې وینا کې وویل: د کارګرانو له زیار او هڅو پرته د هر هېواد او ملت پرمختګ او هوساینه ناشونې ده او هڅه کوو، ترڅو د کارګرانو حقه حقوق لکه: عادلانه مزد، برابر کاري چاپېریال، د مهارتونو پراختیا، غوره کاري شرایط او ټولنیز عدالت تأمین ته زمینه برابره او په ټوله کې د کارګرانو له مشروع حقوقو څخه دفاع ته ژمن یو.
ورپسې د اقتصاد وزارت مسلکي مرستیال عبدالطیف نظري هم په خپلو خبرو کې وویل؛ کارګر د وطن د اقتصاد د ملا تېر ګڼل کېږي او د هېواد د بیخبناوو په جوړولو کې ارزښتمن رول لري.
ښاغلي نظري زیاته کړه: سږ کال په پام کې لرو چې د کارګرانو څخه د ملاتړ په موخه درې کارګرمحوره پالیسۍ؛ د غښتلي ماهر او مسلکي کارګرانو روزنه، له کورنيو تولیداتو څخه ملاتړ او شغلي امنیت تطبیق کړو چې د یادو پالیسیو لومړی ګټه د ټولنې کارګرانو ته رسېږي.
په پای کې امارتي ادارو او خصوصي سکتوراستازو په خپلو خبرو کې د کارګرو له ټولو شرعي او قانوني حقوقو څخه د ملاتړ په موخه ژمنه وکړه، چې په خپل کاري چاپېریال کې به د کارګرانو ټولو حقوقو ته خپله پاملرنه زیاته کړو.
برنامه؛ ځینو ماهرو کارګرانو او کارکوونکو ته د تقدیرپاڼو او ستاینلیکونو په وېش سره پای ته ورسېده.
